УИХ-ын ээлжит бус чуулганаар хэд хэдэн асуудлыг хэлэлцэж эхэлсэн. Ээлжит чуулган ирэх долоо хоногт эхлэх хувиартай байсан. Гэтэл ээлжит бус чуулганаас өмнө яаран сандран ээлжит бусыг зарлан хуралдуудах болсны цаана олон асуудал нуугдаж байна.

    Юуны өмнө Шинэчлэлийн Засгийн газрын зүгээс алтны олборлолтыг нэмэгдүүлэх асуудлыг УИХ-ын ээлжит бус чуулганаар хэлэлцүүлэхээр лобби хийж эхлэв. Эх сурвалжийн мэдээлж байгаагаар бол алтны олборлолтыг ил тод болгох нэрийдлээр хэд хэдэн орд газрын үйл ажиллагааг АН-ынхан сэргээхээр тохиролцсон сураг байна.

    Мөн урт нэртэй хуульд нэмэлт өөрчлөлт оруулах нэрийдлээр нилээд олон ордны үйл ажиллагааг эхлүүлэх боломжийг нээхээр томчууд ярилцжээ. Мэдээж гол ус, нуурын эхэнд байршилтай гэх шалтгаанаар Урт нэртэй хуулийн дагуу үйл ажиллагаа явуулах боломжгүй болоод байсан цөөнгүй алтны ордын хувь заяа ээлжит бус чуулганаар шийдэгдэх нь.

    Үүний зэрэгцээ дархан цаазтай хилийн бүсэд байсан алтны ордын хамрах хэсгийг АН-ын шийдвэрээр дархан цаазтай гэсэн бүсээс хасахаар лобби ил далд өрнөж эхэлснийг саарал ордноос мэдээллээ. Мэдээж тэдгээр ордыг эрх баригч хүчин эзэмших нь тодорхой. Яг энэ асуудлаар УИХ-ын гишүүдийн үнэн төрх тодорно гэж эх сурвалж тайлбарлаж байна. Учир нь хэзээнээсээ нааш дархан цаазтай гэж хамгаалагдсаар ирсэн бүсийн зарим хэсгийг энэ ангилалаас хасч алтыг нь олборлох гэж байхад УИХ-д хичнээн шударга гишүүд байдаг нь харагдана гэж үзэгсэгдийн тоо нэмэгдэж эхэллээ.

    Алтны аж ахуйн нэгжүүдэд тодорхой төрлийн хөнгөлөлт үзүүлэх асуудал ч яригдаж байна. Энэ бүхний үр дүнд эрх баригч хүчин яагаад алтны үйлдвэрлэлд гэнэтхэн анхаарах болов гэдэг асуудал урган гарч ирнэ. Үүнийг олон янзаар тайлбарлаж болох юм. Хамгийн гол нь АН-ынхан алтны олон тооны ордод нөлөөллөө тогтоохийг эрмэлзэж эхэлсэн байна.

    Нөгөө талаараа алтын үйлдвэрлэлийг нэмэгдүүлж байж 8 орчим хувьд хүрч тасрах энэ жилийн төсвийн тасалдлыг нөхнө гэсэн гэнэн тайлбар хэлж байгаа гишүүд бий аж. Одоо өвлийн улирал эхэлж байхад алт олборлоод төсвийнхөө тасалдлыг нөхнө гэдэг бол “харганы унгас түүж эсгий хийнэ” гэдэгтэй дүйж очсон үг болно. Өөрөөр хэлбэл ард түмнийг хуурсан тайлбар л даа.

    Хамгийн гол нь эдийн засгийн хямрал ирэх жил бодитойгоор нэмэгдэх магадлалтай. Тэр үед эдийн засагт ихээхэн мөнгө хэрэгтэй болно. Тэгэхэд л алтны үйлдвэрлэлийг дэмжсэний үр дүн гарна гэх эдийн засагчид байна. Энэ тайлбар үнэнд илүү ойр байж мэднэ. Өөрөөр хэлбэл эрх баригчид алсыг харж, рейтингээ унагахгүйн тулд ирэх жилийн эдийн засгийн хямралаас хамгаалах зорилгоор алтны үйлдвэрлэлийг дэмжиж эхлэв үү эсвэл өөр зорилгоор уу гэдэг нь ирэх өдөрүүдэд тодорхой болно.