Энэ парламент жилийн нүүр үзлээ. Энэ хооронд УИХ-ын гишүүн болсон нөхдүүдийн хэн нь хэн бэ гэдэг танигдаж эхэлсэн. Зарим  нэг нь сонгогдсныхоо дараа авлига, мөнгөний хэрэгт холбогдсон бол зарим нь усанд хаясан чулуу шиг сураг чимээгүй болов. Тэр усанд хаясан чулуу шиг алга болдог, ажлаа хийдэггүй нөхдүүдийг ирэх гурван жилд юу хийх бол гэж хүлээх ч хэрэггүй болж байх шиг. Одоогийн парламентад шоугаар гарч ирсэн ийм гишүүд олон байгаа тул иргэд “болдогсон бол эргүүлэн татахсан” хэмээн халагладаг. Тэгвэл УИХ-ын гишүүн Ж.Батзандан УИХ-ын гишүүнийг эргүүлэн татах хууль санаачилсан нь олон нийтийн анхаарлыг татаад байна. Тэрбээр тойргоос сонгогдсон гишүүнийг нийт сонгогчдын гуравны хоёрын саналаар эргүүлэн татах санал гаргасныг УИХ хүлээн авсан тохиолдолд гишүүнийг эргүүлэн татах санал оруулахаар зэхэж байгаа юм. Өөрөөр хэлбэл тойргийн гишүүнээ эргүүлэн татах санал гаргах эрх сонгогчидод олдох юм. Мөн намын жагсаалтаар гарч ирсэн хэдэн “дархан цаазтай” гишүүд бий. Намын томчууд, лобби сайтай хүмүүс л дандаа намын жагсаалтад багтаж байдаг. Тэгвэл тухайн намын төв байгууллагаас жагсаалтаар УИХ-д суусан этгээдийг эргүүлэн татах санал гаргаж, түүнийг УИХ-ын хүлээн зөвшөөрвөл суудлаас нь эргүүлэн татна гэж төсөлдөө тусгажээ. Энэ хуулийн төсөл тойргоосоо сонгогдсон гишүүдээ нүдээ ширгэтэл хардаг сонгогчдод ихээхэн таалагдаж байгаа аж.

   Сонирхолтой нь энэ төслийг санаачилсан сургаар хамгийн түрүүнд Ж.Батзандан гишүүнийг өөрийг нь эргүүлэн татъя гэх санал гарчээ. Тэрбээр Баянзүрх дүүргээс сонгогдсон ч хааяа нэг зурагтаар чанга чанга ярьж харагддагаас тойргоо эргэж очдоггүй аж. Ямар сайндаа түүнд “чанга дуут” гэдэг хоч өгсөн байхав. Мөн түүнтэй хамт энэ дүүргээс сонгогдсон Д.Арвин гишүүн ч таг чиг. Тэрбээр энэ парламентад өөрийг нь сонгосон баянзүрхчүүдээс илүү өмнө нь хэдэнтээ сонгогдсон Хэнтий аймаг руугаа байн байн гүйдэг. Дондогдулам хатны өргөөндөө хамаг цагаа зарцуулж байгаа бололтой. Тиймээс Баянзүрх дүүргийн гишүүд энэ хоёр гишүүндээ сэтгэл дундуур явж, боломжтой бол хамгийн түрүүнд тойргийнхондоо үзэгддэггүй Ж.Батзанданг эргүүлэн татах хүсэлтэй байгаа аж. Ядаж О.Баасанхүү гишүүн шиг баяраар хүүхдүүдэд бэлэг тараагаад, хэдэн оюутанд сургалтын төлбөр хандивлаад явсан бол өөр хэрэг. Гэтэл бүтэн жилийн турш таг чиг, цаашид тойрогтоо юм хийх эсэх нь ч бүрхэг яваад байдаг тул Баянзүрхэд нэр хүнд нь унаад байгаа бололтой.

   Харин энэ хуулийн төсөл сонгогчдод гишүүнээ эргүүлэн татах боломж үнэхээр өгч чадах уу? гэсэн асуулт гарч ирж байна. Учир нь сонгогчид нийтээрээ хэчнээн их хүслээ ч  УИХ-ын олонхи зөвшөөрөхгүй бол тэгээд л бүтэхгүй болно гэсэн үг. АН-ын нэг нөхрийг сонгогчид нь татан буулгая гэж хүсэлт гаргалаа гэж бодоход эрх баригчид нэг суудлаа тийм амархан тавиад туучихгүй биз. Тиймээс сонгогчид энэ хуулийг “санаа нь зөв ч, босго өндөртэй юм” хэмээн дүгнэж байна.