Ардчилсан намын дэргэд байгуулагдсан шинэ жигүүрийнхэн өнөөдөр албан ёсоор мэдээлэл хийлээ. Ардчилсан нам дотроо МоАХ, Кроун, Нэг Ардчилал, Зүүн хойд Ази, МҮДН, Алтангадас, Ардчилсан залуучуудын холбоо зэрэг олон фракцтай. Харин шинээр байгуулагдсан уг жигүүрийг УИХ-ын гишүүн асан А.Мурат ахлаж байгаа юм. Одоогийн байдлаар тус жигүүрийн зохицуулах зөвлөлийн гишүүнээр нийт 15 хүн ажиллаж байгаа аж. Тус жигүүр нь АН-ын намын цаашдын үйл ажиллагааг идэвхижүүлж, үндсэн дүрмийг мөрдөх зорилготойгоор байгуулагджээ.
2010 оноос хойш АН үндсэн дүрэм, журмаа хэрэгжүүлэхээ больж, мөнгөний нам шиг ажиллах болсон гэдгийг шинээр байгуулагдсан жигүүрийнхэн хэллээ. Тодруулбал, АН сүүлийн жилүүдэд намынхаа нийт гишүүдийг хөсөр хаяж, намын дотоод ажлыг орхигдуулж, дүрэм журмаа уландаа гишгэж, өнөөгийн хүчин төгөлдөр мөрдөгдөж байгаа намын дүрмийг намын удирдлагууд мөрдөхөө больж, хэдхэн хүний хүрээнд хуйвалдаж асуудлыг шийддэг болсон гэлээ.
Намын дүрмийн дагуу жил бүр нам дотор шинэчлэл хийгдэж, АН-д цус сэлбэлт хийгддэг байна. Гэтэл сүүлийн гурван жил нам дотор шинэчлэл хийгдээгүй ба сонгуулиар амалж байсан намын мөрийн хөтөлбөрүүд ч огт хэрэгжихгүй байгаа гэдгийг тэд хэллээ. Тиймээс шинээр байгуулагдсан жигүүр намын одоогийн унтаа байдлыг засч, дүрэм журмыг хэрэгжүүлэхийн төлөө ажиллах юм байна.
Дээрх асуудлаар намын удирдлагууддаа өмнө нь шаардлага тавьж байсан ч саналыг нь хүлээж авч хэрэгжүүлээгүй аж. Гэхдээ цаашид саналыг нь хүлээж авч хэрэгжүүлэх хүртэл шаардлагаа тавьж ажиллана гэдгээ мэдэгдлээ. Хэрэв шаардлагыг нь хүлээж авахгүй бол намын одоогийн удирдлагуудыг огцруулах хүртэл асуудлыг ярина гэв.
Мөн АН дотор шинээр жигүүр байгуулагдсан сургаар хөдөө орон нутгаас олон гишүүд дэмжигчид холбогдож, санал бодлоо хуваалцаж байгаа аж. Шинээр байгуулагдсан жигүүрийнхэн удахгүй 21 аймаг, бүх дүүргүүдэд уулзалт зохион байгуулах юм байна.
Мөн ирэх сарын 6-ны өдөр Туушин компанийн хурлын зааланд “Үндсэн дүрмээ сахихтун, мөрдөхтун” гэсэн хэлэлцүүлгийг хийхээр бэлтгэл ажилдаа орсон бөгөөд намынхаа нийт гишүүдийг тус хэлэлцүүлэгтээ урилаа.
Цаашид ч улс орон даяар далайцтай ажиллана гэдгээ илэрхийлэв. Ойрын хугацаанд нам дотроо цус сэлбэлт хийж, мөрийн хөтөлбөрөө хэрэгжүүлж, намын боловсон хүчинд анхаарал хандуулахыг тэд хүсч байгаа юм байна.Т.Энхэлээ
