МАХН-ын ерөнхий нарийн бичгийн дарга Г.Шийлэгдамба өчигдөр “Шударга ёс” аяныг хэрхэн үргэлжлүүлэх талаараа мэдээлэл хийсэн юм. Энэ үеэр түүнээс хэдэн зүйлийг тодрууллаа.

-Улс төрийн намууд улс оронд үүсээд байгаа нөхцөл байдал дээр яаж бодитой үйл ажиллагаа явуулах ёстой вэ?
-Мэдээж АН, МАН, МАХН, МҮАН, ИЗНН зэрэг намууд УИХ-д суудалтай улс төрийн намууд. Тэгвэл улс төрийн намууд улс оронд үүсээд байгаа нөхцөл байдал, түүнээс гарах арга замын талаар тодорхой бодлого гаргаж УИХ дахь, Засгийн газар дахь төлөөллөөрөө дамжуулж үүнийгээ хэрэгжүүлэх ёстой. Гэвч үндсэндээ намуудын байр суурь тодорхой илэрхийлэгдэж гарахгүй байгаад байна. Тухайлбал, МАН нэг сарын дараа буюу аравдугаар сарын 27-нд намынхаа их хурлыг хуралдуулах гэж байна. Мэдээж бид өөр намууд ч гэсэн УИХ-д суудалтай цөөнхийг бүрдүүлж байгаа нам учраас МАН-ын Их хурал өөрөө өмнөө тавьсан зорилгоо амжилттай хэрэгжүүлж, асуудлаа тавих уу үгүй юу гэдэг дээр анхаарлаа хандуулж байгаа. Зөвхөн намынхаа дотоод асуудалд чиглэгдсэн хурал уу, үнэхээр улс эх орны ирээдүйд чиглэгдсэн хөгжлийн концевцруугаа хандсан, түүнчлэн улс төрийн тогтвортой нөхцөл байдалд нөлөөлөхүйц үр дүнтэй хурал болж чадах уу гэдэг асуудал улс төрийн давцан дахь бусад намуудын анхаарлын төвд байгаа. Эсвэл зүгээр хэдхэн олигархуудтайгаа хамт үлдэх үү. Улс төрийн төвшинд хэдийгээр бид өөр өөр намуудад өрсөлдөж байгаа ч бусад намууд илүү цэвэрших, бусад намууд өөрсдөө үйл ажиллагаа нь тунгалаг сайн явагдах нь нөгөө улс төрийн намууддаа эерэг нөлөөллийг үзүүлдэг. Тэгэхээр МАН муугаасаа салах, сайн сайхнаа үргэлжүүлэх  байдлыг энэ хурлаас гаргах үгүй юу гэдэг анхаарал татаж байна. Мөн энэ хурал бидний “Шударга ёс” аяны үйл ажиллагаатай уялдана. Бидэнд хандаж байгаа олон хүмүүс байдаг. Тухайлбал, МАН-ын гишүүд дэмжигчдийн зүгээс. Тэд бид энэ их хурлаасаа ийм үр дүн хүлээж байгаа, МАХН, МАН хоёр бол ойролцоо үзэл баримтлалтай нэгэн цагт нэгдмэл нэг улс төрийн хүчин болсон ийм нам. Энэ намын их хурлын үйл ажиллагаанаас шалтгаалж цаашлаад улс төрийн зарим сонголтонд тодорхой нөхцөл байдал хүмүүст үүснэ. Иймээс МАХН-ын үйл ажиллагаа хөдөө орон нутагруу чиглэгдэж, тэдгээр хүлээлт үүсээд байгаа хүмүүс бид хүрч очиж тэдний хувьд бидний дуу хоолой ямар итгэл үнэмшил төрүүлэх вэ гэдгийг бид улс төрийн энэ аяныхаа хүрээнд явуулах зорилготой. Тэгэхээр бид ард иргэдтэй уулзахаас гадна МАН-ын гишүүд дэмжигчдэд тодорхой дуу хоолойгоо хүргэж ажиллахыг зорино. Мөн өөрийнхөө намын гишүүд дэмжигчидтэй тодорхой асуудлаас санал бодлоо солилцох үйл ажиллагаа “Шударга ёс” аяны хүрээнд явуулахаар төлөвлөж байгаа юм.

-Танай намын хувьд бага хурал, их хурлынхаа товыг яг гаргасан уу?
-Манай намын хувьд энэ ондоо багтааж намынхаа бага чуулганыг хуралдуулж, өнгөрсөн сонгуулийн үр дүнгийн талаар тодорхой асуудлыг авч хэлэлцэнэ. Түүнчлэн цаашлаад явуулах үйл ажиллагааныхаа талаар ярилцана. Он гараад нэгдүгээр сарын сүүлээр буюу МАХН-ын онц их хурал хуралдаж байсан энэ цаг хугацаатай уялдуулж намынхаа их чуулганы хуралдуулна гэсэн төлөвлөгөөтэй ажиллаж байгаа.

-МАН-ын 27 дугаар их хурлыг анхааралтай ажиглаж байна гэлээ. Магадгүй 27 дугаар их хурлаас  та нарын хүсч байгаа шиг шийдвэр гарах юм бол хоёр нам буцаад нэгдэх асуудал яригдах уу?
-Хоёр намын нэгдэх эсэх тухай асуудал байнга яригддаг. Бид бол хоёр нам нэгдээд нэг нам болчих тухай асуудлыг огт ярихгүй байгаа. Энэ бол цаг хугацааны асуудал. Бид зөвхөн МАН биш өнөөдөр улс төрийн идэвхтэй үйл ажиллагаа явуулж байгаа бусад намуудтай хамтарч ажиллах үйл ажиллагаанд илүү ач холбогдол өгч байна. Хамтын ажиллагаа гэдэг нь зөвхөн нэг сонгуулиар хязгаарлагдаж болохгүй. Тухайлбал, МАН-аас бидэнд санал тавихдаа зөвхөн орон нутгаар сонгуулиар, зөвхөн Ерөнхийлөгчийн сонгуулиар ч юм уу хамтарч ажиллая гэдэг. Үүгээр хамтын ажиллагаагаа хязгаарлах гэдэг. Бид бол арай өөр. Нэг сонгуулиар үйл ажиллагаагаа хязгаарлавал энэ нь сайн хамтын ажиллагаа биш юм. Хамтын ажиллагаа гэдэг дор хаяж дөрвөн жилээр яригдах ёстой. Дөрвөн жилийн УИХ-ын бүрэн эрхийн хүрээнд улс эх оронд хэрэгцээтэй шаардлагатай, ард иргэдийн нийтлэг эрх ашгийн төлөө ямар хуулийн орчинг сайжруулах тал дээр цогцоор нь хамтын ажилллагаа явуулах хэрэгтэй юм.

-Гишүүд намаа сольдог. Энэ дээр та ямар бодолтой байдаг вэ?
-Аль нэг намаас нөгөө намруу элсэх асуудлыг хараар будах гэж оролддог. Гэвч энэ бол хүмүүсийн итгэл үнэмшлийн асуудал. Тэр тусмаа МАН, МАХН-ын хувьд  гишүүд гарч орж байгаа нь гайхагдахаар асуудал биш.