Хоёр жилийн өмнөөс л Зайсанг төрийн тусгай хамгаалалтаас гаргах талаар ярьж байсан. Бүр тодруулж хэлбэл, Д.Ганхуяг тэргүүтэй нэр бүхий гишүүд Богдхан уулын Зайсангийн амнаас эхлээд хэд хэдэн газрыг тусгай хамгаалалтаас нь гаргах тухай тогтоолын төслийг боловсруулж байлаа. Гэвч энэ нь ажил хэрэг бололгүй тэгсхийгээд л өнгөрсөн. Харин АН-ын лоббигоор Зайсанг төрийн тусгай хамгаалалтаас гаргах цаг тун ойрхон иржээ. Учир нь Соёл, спорт аялал жуулчлалын сайд Ц.Оюунгэрэл, Гадаад харилцааны сайд Л.Болд хоёр Богдхан уулын Зайсангийн ам, Арцатын ам, Богинын амны зарим хэсгийн тусгай хамгаалалттай газрыг хилийн заагаас чөлөөлөх тухай УИХ-ын тогтоолын төслийг энэ сарын 6-нд УИХ-ын дарга З.Энхболдод өргөн барьсан.

 Тогтоолын төсөлд тусгаснаар Зайсангийн амнаас 23.2 га, Богинын амнаас 0.3 га, Арцатын амнаас 21.8 га, нийт 45.3 га газрыг тусгай хамгаалалттай газар нутгийн хилийн цэгээс чөлөөлүүлэхээр тусгажээ.

Тэд энэхүү төслөө олон жил энэ газарт амьдарсан 700 гаруй өрхийн 2000 хүний газар өмчлөх эрхийг баталгаажуулахын тулд гэж тайлбарлаж байгаа. Гэтэл тэдний яриад байгаа тийм олон тооны   уугуул иргэд байдаггүй. Харин барилгынхнаас газраа харамлаж, өмчлүүлж өгөхийг байнга шаарддаг  хэдхэн тооны л хүмүүс байдаг гэгдгийг хэн хүнгүй л мэдэх билээ. Өөрөөр хэлбэл, өдгөө Зайсангийн аманд 700-гаад айл биш 50-60 айл л байдаг.  Тэгэхээр энэ хэдхэн айлын төлөө хуулийн төсөл өргөн барьсан уу, тусгай хамгаалалтаас гарахын төлөө улайрч байгаа томчуудын төлөө ингэж байна уу гэдгийг хүмүүс өөр өөрийнхөө бодож тунгаах биз ээ.

За яахав үнэхээр тэр 50-60 айлын төлөө ийн хуулийн төсөл гаргасан байлаа гэхэд хоёр гишүүн маань  2016 оны сонгуулийн PR-аа хийж явна гэж ойлгоход хүргэж байгаа юм. Учир нь шинэчлэлийн Засгийн газарт тохой залган суугаа энэ хоёр эрхэм нэг намаас нэг тойрогт нэр дэвшиж ялалт байгуулсан. Хан-Уулаас сонгогдсон тэд Богдхан уулын дархан цаазат газраас сонгогчдодоо тасдаж өгөх санаачилж байгаа нь 2016 оны сонгуулийн PR-тай нь салшгүй холбоотой нь дамжиггүй.

Богдхан уул бол дэлхийд хамгийн анхны дархан цаазтай уул. Орчин цагийнхаар бол төрийн тусгай хамгаалалттай газар нутгаа төр нь хамгаалж байгаа хэрнээ л Зайсан орчмыг өнөөдөр ямар байдалд хүргэчихээд байгаа билээ. Худлаа ч гэсэн хуулийн хамгаалалттай байхад ийм байгаа юм чинь хамгаалалтаас нь гаргачихвал юу болох бол.

 Зайсан орчмын айлуудад газрыг нь өмчлүүлэх нэрийдэлтэй энэ төслийг нь Засгийн газар хүртэл дэмжчихээд байна. Нөгөө байгаль орчноо хайрлана, ногоон хөгжлийг дэмжинэ гэж мөрийн хөтөлбөрөө УИХ-аар батлуулсан шинэчлэлийн Засгийн газар танхимын хоёр сайдынхаа лоббид орчихсон л тууж явна шүү дээ.