“Жаст”-ын Ш.Батхүү гэгч дампуурсан бизнесменээс болж өмнө нь төрийн өндөр албан тушаалд данхалзаж явсан хэд хэдэн хүн хуулийнханд ээрэгдээд байна. Түүнийг Өмнөд Африкийн “Стандарт” банкнаас зээл авахдаа улсын “Эрдэнэт” үйлдвэрээс баталгаа гаргуулж авсан гэх хэргийг хуулийнхан шалгаж байгаа билээ. Ш.Батхүүг хуурамч гарын үсэг үйлдэж зээл авсан гэж үзэж байгаа. Харин тэрбээр “Тийм хуурамч гарын үсэг зурсан асуудал байхгүй” гэж сүр бараатай хэвлэлийн хурал хийхдээ олон нийтийг хуурч, өөрийгөө олон жилийн хөдөлмөр нь юу ч үгүй болсон өрөвдөлтэй хүн хэмээн харагдуулж чадсан. Гэсэн ч хуулийнхан түүнийг хуурам гарын үсэг үйлдсэн гэж шалгасаар л байна.
       Харин үүнээс илүүтэйгээр Ш.Батхүүгийн хэрэгт Ерөнхий сайд асан С.Баяр холбогдож байгаа нь сонирхолтой. С.Баярыг Ерөнхий сайдын суудлаас бууснаас хойш авлига эсвэл албан тушаалаа урвуулан ашигласан гэх хэрэгт холбоотой л байж таарна гэх явган хардлага байсаар байсан. Гэтэл Ш.Батхүүгийн хэрэгт холбоотой болоод ирлээ.

    “С.Баяр бол миний ах” гэж бизнесмен Ш.Батхүү хэлсэн. Үнэхээр ч Ш.Батхүүгийн бизнесийг далдуур асар ихээр дэмжсэн хүн нь С.Баяр байсан бололтой. Тэрбээр ажлаа өгөхдөө дараагийн Ерөнхий сайдад “Жаст” группыг даатгасан гэх яриа байдаг. Тиймдээ ч “Жаст” групп нөөцийн махны том тендерийг авсан гэх. Хамгийн гол нь ноён Ш.Батхүүгийн хуурамч гарын үсэг үйлдсэн гэх хэргийг шалгаж байх явцад Ерөнхий сайд асан С.Баярын хувийн данс руу “Эрдэнэт” үйлдвэрээс таван сая ам.доллар шилжсэн гэх мэдээллийг хэвлэлийнхэн сөхөж эхэллээ. Мөн ТӨХ болон “Улаанбаатар төмөр зам-ын данснаас ч мөнгө шилжиж байсан гэх мэдээлэл хэвлэлд гарчээ. Үүнийг АН-ынхан яаран сандран шүүрч авч улс төржүүлж эхэллээ. Тэд С.Баяр Ерөнхий сайд байхдаа энэ мэт авлига авч байсны дөнгөж эхлэл энэ, удахгүй олон хэрэг нь илэрнэ гэх мэтээр хоорондоо дэвэргэн ярьж байгаа сурагтай. Энэ хуурамч гарын үсгийн хэрэг “Эрдэнэт”-ийн захирал асан С.Ганзоригийг ч шалгах үндэслэл болсон аж.
         Харин С.Баярын хувьд үүнийг чухалд тооцон тайлбар хийх хэрэггүй гэж бодож байгаа бололтой. Тэрбээр “Эрдэнэт”-ээс авсан гэх таван сая долларыг үгүйсгэж байгаа аж. “Хэрэв нэг хүний хувийн данс руу шилжүүлсэн бол С.Баяр гээд баримт нь тов тодорхой гараад ирнэ” гээд шалгуулахад саадгүй гэдгээ мэдэгдэж байгаа гэнэ. Хэрэв С.Баяр хуурамч гарын үсэг, авлигын хэрэгт холбогдвол МАН-ын нэрх хүнд асар ихээр унах нь ойлгомжтой.
   Энэ үйл явдлыг, таван сая ам.долларын асуудлыг АН-ынхан ихээхэн улс төржүүлж байгаа бол С.Баяр үгүйсгэж байна. Тэрбээр “Баримтаа гаргаад ир. Хэрэв нэг хүний хувийн данс руу шилжүүлсэн бол тов тодорхой гараад ирнэ” гэж байгаа аж.