Ерөнхий сайд Н.Алтанхуягийг хамгийн “ам султай”, бодлогогүй үг ярьдагаараа алдартай гэдэг. Тэрбээр Турк улсад айлчилж байхдаа “манай Турк улс” гэж хэлээд шүүмжлүүлсэн. Мөн саяхан шатахууны үнэ өсөхгүй гэж мэдэгдэж байсан бол өчигдрөөс зарим компаниуд бензиний үнээ нэмээд эхэллээ. Хааяа, хааяа ийм болчимгүй ч юм шиг мэдэгдэл хийчихдэг Ерөнхий сайд маань бас бодлогогүй үгнээсээ болж Ардчилсан намын зарим гишүүдээ эмзэглүүлж орхисон байна.

   Тэрбээр Ардчилсан намд шинээр үүссэн жигүүрийн тухай асуухад “АН бол төлөвшсөн, үлгэр жишээ нам болсон” хэмээн хариулахын зэрэгцээ “Одоо гайгүй, бужигнахгүй. Манай намын чөтгөрүүд цөөрчихсөн” гэжээ. Энэ үгэнд эмзэглэсэн гишүүд нь намын дарга чухам хэнийг “чөтгөр” гэснийг тааж ядаж байгаа аж. Түүний хэлсэн энэ үг нь шинээр жигүүр байгуулсан гишүүдэд нь илүү хүндээр тусчээ. Учир нь энэ үгийг нь сайн ухвал жигүүрийнхэнийг Ардчилсан намыг бужигнуулж магадгүй “чөтгөрүүд” гэсэн утгатай зүйл ярьчихсан бололтой. Жигүүрт багтаж буй ҮЗХ-ны гишүүн Д.Аззаяа “АН-д чөтгөр байсан гэхэд итгэхгүй байна. Үгийн тайлбарыг нь өөрөөс нь асуух хэрэгтэй. Монгол улсыг баллая, чөтгөр болъё гэж туг барьж цагаан морин жилийн хувьсгалыг журмын нөхдүүд маань хийгээгүй Энэ хувьсгалыг авчралцсан хүний нэг нь манай дарга гэж боддог” гэжээ.

   Ардчилсан намын даргын болчимгүй гэмээр энэ үг намынхан төдийгүй бусад улс төрчдийн дунд ч АН “чөтгөр”-тэй эсэх талаар яриа өрнүүлж байна. Ардчилсан намыг бусниулах гээд, намын даргын суудлыг ганхуулах гээд байгаа “чөтгөр”-үүд байна уу? гэж. Н.Алтанхуягийг огцруулна гэж байн байн яригддаг ч одоохондоо тийм “хоншоортой” аавын хүү, ээжийн охин гарч ирээгүй л байна. Гэхдээ Н.Алтанхуягийн намын даргын бүрэн эрхийн хугацаа дөхөж, их хурал хуралдах дөхөөд байхад ийм болчимгүй үг хэлчихлээ. АН-д одоогоор Ёс зүйн дүрэм байхгүй гэдгийг гишүүд нь ярьдаг. Өөрөөр хэлбэл ийм ёс зүйгүй үг хэлсэн даргадаа хариуцлага тооцох тухай яриа байхгүй гэсэн үг. Гэсэн ч байн байн "ам нь халдаг" даргадаа намынхан нь дургүйцэж эхэлжээ.  Шинэ жигүүрийнхэн ч “намд дүрмийн шинэчлэлт хэрэгтэй, Ёс зүйн дүрэмтэй байх ёстой” гэж үзжээ. Хэрэв Н.Алтанхуяг гишүүдээ "чөтгөр" гэж бодож байгаа бол манай улс орныг хэн удирдаад байна вэ?