Монгол Улсаас БНТүрк Улсад суугаа Онц бөгөөд Бүрэн эрхт Элчин сайд Б.Батхишиг тус улсын Ерөнхий сайдын дэргэдэх Гадаадад байгаа түркүүд болон ах дүү ард түмнүүдтэй харилцах асуудал эрхэлсэн хорооны дарга Кемал Юртначтай есдүгээр сарын 30-нд уулзаж, Түркт суралцах монгол оюутны тоог нэмэгдүүлэх, сонгон шалгаруулалт хийх, мэргэжил сонгох талаар ярилцав.

Түркийн Засгийн газрын тэтгэлгээр 2011 онд Монголын 95 оюутан тус улсын их сургуулиудад элссэн бол энэ тоо 2012 онд 52, 2013 онд 47 болж буурчээ.

Иймд Түркийн Засгийн газрын тэтгэлгээр суралцах монгол оюутны тоог жилд 90-ээс доошгүй байлгах, цаашид нэмэгдүүлэх саналыг Элчин сайд Түркийн талд тавив. Элсэлтийн шалгалтын болзол, шаардлагыг биелүүлсэн нөхцөлд оюутны тоог нэмэгдүүлэх боломжтойг ноён К.Юртнач мэдэгдэв.

Мөн Түркт суралцах Монголын оюутнуудын мэргэжлийг тодорхойлох, шалгалт авахад Монгол Улсын Боловсрол, шинжлэх ухааны яамны оролцоог хангах асуудлыг Элчин сайд Б.Батхишиг тавьсан бөгөөд манай оюутнуудын суралцах мэргэжлийн талаар тус яамны саналыг авах, мөн яамны төлөөллийг элсэлтийн сонгон шалгаруулалтад оролцуулах боломжтой тухай Түркийн тал мэдээлэв.

БНТУ-ын Засгийн газар болон түүний сургалтын сангууд 1992 оноос эдүгээ хүртэл  Монголын нийтдээ 1000 орчим оюутанд тэтгэлэг олгожээ. Эдүгээ тус улсад манай 850 орчим оюутан суралцаж байгаагийн тал нь Түркийн Засгийн газрын болон сангуудын тэтгэлгээр сурч байна.