УИХ-ын Тамгын газрын Хэвлэл мэдээлэл, олон нийттэй харилцах хэлтсийн дарга Д.Энхтуяа УИХ-ын шинэ долоо хоногийн үйл ажиллагаа, цаг үеийн бусад асуудлын талаар өнөөдөр 10 цагт сэтгүүлчдэд мэдээлэл хийлээ.Тэрээр мэдээллийнхээ эхэнд өнөөдөр ажлаа эхлэх гэж байгаа УИХ-ын 2013 оны намрын ээлжит чуулганаар хэлэлцэх асуудлын дарааллын талаар танилцуулав. УИХ-ын даргын 2013 оны 9 дүгээр сарын 23-ны өдрийн 167 дугаар захирамжаар Улсын Их Хурлын 2013 оны намрын ээлжит чуулганаар хэлэлцэх асуудлын дарааллыг тогтоосон. Захирамжид намрын ээлжит чуулганаар 19 хууль тогтоомжийн төслийг хэлэлцэхээр нэр зааж дурдсан. Тухайлахад, Монгол Улсын 2014 оны төсвийн тухай хуулийн төсөл; Хүний хөгжил сангийн 2014 оны төсвийн тухай хуулийн төсөл; Нийгмийн даатгалын сангийн 2014 оны сангийн тухай хуулийн төсөл; “Төрөөс мөнгөний бодлогын талаар 2014 онд баримтлах үндсэн чиглэл батлах тухай” Улсын Их Хурлын тогтоолын төсөл; Хилийн боомтын тухай хуулийн төсөл; Иргэний эрүүл мэндийн даатгалын тухай хуулийн төсөл /Шинэчилсэн найруулга/; Соёлын өвийг хамгаалах тухай /Шинэчилсэн найруулга/ зэрэг хуулийн төслүүд, мөн “Ногоон хөгжлийн үзэл баримтлал, дунд хугацааны хөтөлбөр батлах тухай”, “Төрөөс эрдэс баялгийн салбарт баримтлах бодлого батлах тухай” Улсын Их Хурлын тогтоолын төслүүдийг хэлэлцэхээр заасан. Түүнчлэн хаврын чуулганаар хэлэлцэх эсэхийг нь шийдсэн Газрын тухай, Газрын кадастрын тухай хуулийн төслүүдийн шинэчилсэн найруулга, Геодези, зураг зүйн тухай хуульд нэмэлт, өөрчлөлт оруулах тухай хуулийн төслүүд дараалалд орсон байгаа. Харин захирамжид нэр зааснаас бусад хэлэлцүүлгийн шатанд байгаа болон хууль санаачлагчаас УИХ-д өргөн мэдүүлсэн хууль, УИХ-ын бусад шийдвэрийн төслийг намрын ээлжит чуулганаар хэлэлцүүлэх асуудлыг тухай бүр УИХ-ын даргын дэргэдэх Зөвлөлөөр хэлэлцүүлэн шийдвэрлэж байхаар тогтоосон байгаа гэдгийг тэрээр дурдлаа.
Мөн өнгөрсөн долоо хоногт өндөрлөсөн УИХ-ын ээлжит бус чуулганаар хөрөнгө оруулалт, эрдэс баялгийн салбарт үүссэн нөхцөл байдлыг эрх зүйн хувьд засч залруулах зорилгоор 5 багц хуулийн төслийг хэлэлцүүлэхээр оруулсан ч тодорхой шалтгааны улмаас ээлжит бус чуулганы хугацаанд баталж амжаагүй учраас эдгээр төслүүдийг намрын ээлжит чуулганаар эцэслэн шийдвэрлэхээр тогтсон байгаа. Учир нь Хөрөнгө оруулалтын тухай, Хөрөнгө оруулалтын сангийн тухай хуулийг гишүүдийн 170 гаруй ажил хэрэгч санал дүгнэлтийг тусгаж эцсийн хэлэлцүүлэгт шилжүүлсэн хэдий ч нэмэлтээр орсон саналуудыг нэгтгэж төсөлд тусгаж батлахад цаг хугацааны хувьд боломжгүй болсон, Ардчилсан намын болон МАХН-МҮАН-ын “Шударга ёс” эвслийн бүлэг “Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай” хуультай холбогдсон нэмэлт мэдээлэл цуглуулах, санал авах шаардлагатай учир намрын ээлжит чуулганаар хэлэлцүүлэх хүсэлт тавьсан, ”Алтны худалдаанд ил тод байдлыг бүрдүүлэх тухай”, “Түгээмэл тархацтай ашигт малтмалын тухай” хуулийг Эрдэс баялгийн салбарт төрөөс баримтлах бодлоготой уялдуулах нь зүйтэй гэж үзэж МАН-ын бүлэг завсарлага авсан зэрэг шалтгаанаас болсныг УИХ-ын дарга З.Энхболд ээлжит бус чуулганыг хааж хэлсэн үгэндээ онцлон дурдсан гэдгийг тэрээр хэллээ.
УИХ-ын даргын дэргэдэх зөвлөлийн хурлаар баталсан УИХ-ын 2013 оны намрын ээлжит чуулганы эхний хоногийн үйл ажиллагааны хуваарь ёсоор өчигдөр байнгын хорооны ажлын хэсгүүд хуралдаж Хөрөнгө оруулалтын тухай, Хөрөнгө оруулалтын сангийн тухай болон холбогдох бусад хуулийн төслүүд, “Төрөөс эрдэс баялгийн салбарт баримтлах бодлого батлах тухай” УИХ-ын тогтоолын төсөл зэргийг хэлэлцүүлэгт бэлтгэсэн бол лхагва гарагт Төсөв, Эдийн засаг, Байгаль орчин, хүнс, хөдөө аж ахуйн байнгын хорооны 4 ажлын хэсэг хуралдахаар төлөвлөөд байна.
Байнгын хороодын тухайд 10 дугаар сарын 02-ны лхагва гарагт Эдийн засгийн байнгын хороо Хөрөнгө оруулалтын сангийн тухай, Хөрөнгө оруулалтын тухай хуулийн төсөл, эдгээрийг дагалдан зарим хуулийг хүчингүй болсонд тооцох, зарим хуульд нэмэлт, өөрчлөлт оруулах тухай хуулийн төслүүдийн эцсийн хэлэлцүүлэг, “Төрөөс эрдэс баялгийн салбарт баримтлах бодлого батлах тухай” УИХ-ын тогтоолын төслийн анхны хэлэлцүүлгийг хийх бол Хууль зүйн байнгын хороо Хохирлыг эргэн төлөгдөх нөхцөлөөр барагдуулах тухай хуульд өөрчлөлт оруулах тухай хуулийн төслийн анхны хэлэлцүүлэг, Шүүх байгуулах тухай хуульд өөрчлөлт оруулах тухай хуулийн төсөлийн хэлэлцэх эсэхийг шийдвэрлэнэ. Харин Аюулгүй байдал, гадаад бодлогын байнгын хороо “Газрыг улсын тусгай хэрэгцээнд авах тухай”, Монгол Улсад суугаа зарим орны Элчин сайдын яаманд олгосон газрыг улсын тусгай хэрэгцээнд авах тухай” УИХ-ын тогтоолын төслийн хэлэлцэх эсэхийг хэлэлцэж, Монгол Улсын Засгийн газар, Японы Олон Улсын хамтын ажиллагааны байгууллага хооронд байгуулах “Дөрөвдүгээр цахилгаан станцын үр ашгийг дээшлүүлэх төслийн зээлийн гэрээ”-ний төслийг зөвшилцөнө.
УИХ-ын 2013 оны намрын ээлжит чуулганы нэгдсэн хуралдаан 10 дугаар сарын 03, 04-ний өдрүүдэд хуралдана. Чуулганы нэгдсэн хуралдаанаар Хөрөнгө оруулалтын сангийн тухай, Хөрөнгө оруулалтын тухай хуулийн төсөл, тэдгээрийг дагалдан зарим хуулийг хүчингүй болсонд тооцох, зарим хууль тогтоомжид нэмэлт, өөрчлөлт оруулах тухай хуулийн төслүүдийн эцсийн хэлэлцүүлэг; хаврын ээлжит чуулганаар хэлэлцэхийг дэмжсэн “Төрөөс эрдэс баялгийн салбарт баримтлах бодлого батлах тухай” УИХ-ын тогтоолын төсөл; Хилийн боомтын тухай хуулийн төсөл, уг төслийг дагалдан зарим хуульд нэмэлт, өөрчлөлт оруулах тухай төслүүд, Хохирлыг эргэн төлөгдөх нөхцөлөөр барагдуулах тухай хуульд өөрчлөлт оруулах тухай хуулийн төслийн анхны хэлэлцүүлгийг хийнэ гэдгийг Д.Энхтуяа дарга дурдав.
Мөн УИХ-ын даргын захирамжаар “Улсын Их Хурлын үйл ажиллагааг сурвалжлах, мэдээлэх журам”-ыг баталсан. Энэ захирамжийн дагуу Монгол Улсын Их Хурлын чуулганы хуралдааны дэгийн тухай хуулийн 531 дүгээр зүйлд зааснаар парламентын сурвалжлагчдад УИХ-ын үйл ажиллагааг сурвалжлах эрхийн үнэмлэхийг нэр зааж олгохоор болж байгаа. Журмыг УИХ-ын 2013 оны намрын ээлжит чуулганаас эхлэн хэрэгжүүлж эхэлж байгааг тэрээр хэллээ гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.
