НҮБ-ын Ерөнхий ассамблейн 68 дугаар чуулганы хүрээнд Далайд гарцгүй хөгжиж буй орнууд (ДГХБО)-ын Гадаад харилцааны сайд нарын ээлжит XII уулзалт 9-р сарын 30-нд Нью-Йорк хотноо болов.Уулзалтыг ДГХБО-ын бүлгийн дарга Лаос Улс даргалж, эл уулзалтад бүлгийн гишүүн орнуудын сайд, төлөөлөгчдөөс гадна НҮБ-ын Ерөнхий нарийн бичгийн дарга Бан Ги Мүн, НҮБ-ын системийн болон олон улсын зарим байгууллагуудын төлөөлөл оролцов.
Эл уулзалтад Монгол Улсаас НҮБ-ын дэргэд суугаа Байнгын төлөөлөгч О.Оч, ГХЯ-ны Олон улсын байгууллагын газрын захирал Г.Ганболд, ДГХБО-ын Олон улсын судалгааны төвийн захирал Э.Одбаяр нар оролцов.
Байнгын төлөөлөгч О.Оч үг хэлэхдээ, Монголын Засгийн газар 2012-2016 онд баримтлах мөрийн хөтөлбөрт "... НҮБ, түүний системийн байгууллагуудтай хамтын ажиллагаагаа идэвхтэй үргэлжлүүлж, далайд гарцгүй хөгжиж буй орнуудын эрх ашгийг хамгаалахад бодитой ахиц гаргах ..." тухай тодорхой тусгаж, ажиллаж буйг цохон тэмдэглэв.
ДГХБО-ын бүлгийн идэвхтэй гишүүн байсаар ирснийг онцлон тэмдэглэж, 2014 онд болох "Алматын Үйл Ажиллагааны Хөтөлбөр"-ийн хэрэгжилтийг хянах хуралдааны бэлтгэл ажилд ач холбогдол өгч, шаардагдах арга хэмжээнүүдийг авч буйг дурдав.
Мөн Дохагийн худалдааны олон талт хэлэлцээр өнөөг хүртэл мухардалд байгаад санаа зовж байгаагаа цохон тэмдэглээд, энэ асуудлын хүрээнд Өмнөд-өмнөдийн хамтын ажиллагаатай үйл ажиллагаагаа бэхжүүлэх хэрэгтэй байна гэв.
Цааш нь, ДГХБО нь уур амьсгалын өөрчлөлтөд эмзэг, өртөмтхий тул энэ асуудлаарх хэлэлцүүлэг, түүнээс гарах төгсгөлийн баримт бичигт ДГХБО нь бүлгийн бүтцээр оролцож, сонирхлоо нэгдмэл байр сууринаас илэрхийлэх шаардлага буйг цохон тэмдэглэж, эл асуудалтай холбоотой манай саналыг уулзалтын төгсгөлийн баримт бичигт тусгасанд талархалаа илэрхийлэв.
Олон улсын хамтын нийгэмлэг 2015 оноос хойшхи хөгжлийн хөтөлбөрийг боловсруулж буй энэ цаг мөчид манай улсын санаачлагаар Улаанбаатар хотноо байгуулах гэж буй ДГХБО-ын Олон улсын судалгааны төв нь нэн чухал ач холбогдолтой бөгөөд төвийн ажиллагааг даруй эхлүүлэх бэлтгэл ажлыг манай Засгийн газар амласан ёсоор ханган ажиллаж буй талаар мэдээлж, саяхан эл төвийн 2014 оны санхүүжилтэд 540 сая төгрөгийн төсөв батлаад буйг онцлов. Мөн Олон улсын судалгааны төв байгуулах тухай Засгийн газар хоорондын олон талт хэлэлцээрт нэгдэн ороогүй далайд гарцгүй орнуудыг нэгдэн орохыг уриалав.
Тус уулзалтад ДГХБО-ын Олон улсын судалгааны төвийн захирал Э.Одбаяр төвийн үйл ажиллагааны ахиц, шинэ вэб хуудсын талаар мэдээлэл хийлээ.
