Норовын Алтанхуягийн толгойлсон Шинэчлэлийн Засгийн газар байгуулагдсан цагаасаа сонирхолтой томилгоонууд хийж эхэлсэн. Тэдний зарим нь нүдээ олсон бол цөөнгүй нь хэл ам дагуулж, хууль бус томилгоо хэмээн Н.Алтанхуягийн нэр нүүрийг барж байна.

  ТЕГ-ын даргын суудал-Б.Ариунсан
   Өмнөх Засгийн газарт ЭБЭХ-ний яамны дэд сайдаар ажиллаж байхдаа шатахууны үнийг хуурамчаар нэмсэн гэж ажлаа халагдаж байсан дуулиант эрхэм Н.Алтанхуягийн Засгийн газрын байгуулагдсны дараахан ТЕГ-ын дэд дарга болчихсон. Түүнийг мэргэжлийн хүн биш гэж шүүмжилсээр албан тушаалаас нь буулгасан ч төд удалгүй ТЕГ-ын дарга болоод эргээд ирсэн. Ерөнхий сайд “Би хэнийг ажиллуулахаа өөрөө мэдье” гэх утгатай үг хэлээд олныг гайхашруулсан. Б.Ариунсан Инженер геологич, эдийн засагч мэргэжилтэй. Түүнийг улсын нууц, аюулгүй байдалтай холбоотой ажлыг даагаад явах хүн эсэхэд эргэлзэх хүн цөөнгүй. Хамгийн сүүлд “Гал үндэстэн” холбооны хэдэн нөхөд тэсрэх бөмбөг байрлуулж шуугиан дэгдээсэн явдалд манай тагнуулынхан хэр ажилласан бэ гэдгээр түүний ажлыг дүгнэх биз.

    ЗГХЭГ-ийн дэд дарга- Г.Дэнзэн
    Хамгийн залуу хэрнээ хамгийн азтай албан тушаалтнаар тодорч, олон хүний шарыг гозойлгосон хүн бол Г.Дэнзэн. 17 тэрбум төгрөгийн тендерт эхнэр нь нэр холбогдсон, өөрөө хамаатан саднуудаа төсвийн мөнгөөр гадаадад аялуулсан гээд баахан “бантантай” эр. Хэрэв олон нийт түүнийг “онилж” шүүмжлээгүй бол одоо хүртэл хүргэн ах Н.Алтанхуягийнхаа далбаан дээр намирч явах байсан биз ээ.

Стандартчилал, хэмжилзүйн газар- Г.Энхтайван
   Ерөнхий сайд  Н.Алтанхуяг Стандартчилал, хэмжилзүйн газрын дарга Г.Гантөмөрийг үүрэгт ажлаас нь гэнэт чөлөөлж Г.Энхтайван гэх өөрийн дотны найзыг томилсон. Үүнийг эсэргүүцсэн Г.Гантөмөр Нийслэлийн Сүхбаатар дүүргийн шүүхэд хандсан байдаг. Шүүх хурлаар Г.Гантөмөрийн нэхэмжлэлийг авч  хэлэлцээд  Засгийн газар хууль зөрчин хууль бус томилгоо хийсэнийг тогтоосон. Тиймээс Г.Гантөмөрийг хуучин эрхэлж байсан ажилд нь  эгүүлэн томилоод байна.

    ШӨХТГ-ын дарга О.Магнай
    Шинэчлэлийн Засгийн газрын хамгийн нүдээ олсон томилгоог энэ гэдэг. Анх “гудамжны жагсагч” тодотголтой байсан тэрбээр энэ албанд очоод ШӨХТГ-ыг амь оруулж өгсөн гэдэгтэй олон хүн санал нийлнэ. Хэрэв “таксины үнийг нэмнэ” гэж яаран мэдэгдээд, түүнээс болж уучлал гуйсан хөгтэй явдал болоогүй байсан бол хийсэн ажлаараа энэ оны онцлох хүнээр яалт ч үгүй тодрох байлаа.

ГССҮТ-ийн захирал Ц.Энхбаяр
  МАХН-ын дарга асан Н.Энхбаярын эмч байсан Л.Жамбалжавын оронд ирж буй ГССҮТ-ийн шинэ захирал Ц.Энхбаярыг эсэргүүцэж тангараг өргөсөн эмч нар суулт хийх дээрээ тулж байна. Эх сурвалжийн мэдээлснээр хуучин эмч нар шинэ даргаар булхайгаа дэлгүүлэхгүй гэж ийнхүү эсэргүүцэж байгаа бололтой. Энд газрын наймаа, хууль бусаар төлбөртэй эмчилгээ, хагалгаа хийдэг гээд олон “но”-той гэх. Тиймээс гэнэт ирсэн Ц.Энхбаярыг ажиллуулахгүй хэмээн “айж” байгаа талаар мэдээлж байна. Ц.Энхбаяр нь Монголын урдаа барьдаг тархины мэс засалч нарын нэг аж. Тиймээс салбараа мэддэг хүний хувьд ГССҮТ-ийн захирлаар ажиллаж чадна хэмээн томилсон ч хуучин бууны хугархайнууд нь эсэргүүцэн шуугиан тарьж байна. Энэ мэтээр Н.Алтанхуягийн Засгийн газрын шуугиантай томилгоонууд үргэлжилсээр байна.