Сүүлийн үед АН-ын дотоод зөрчил хурцдаж, туйлдаа хүрлээ. Хамгийн сүүлд гэхэд л АН дотор шинээр жигүүр байгуулагдаж, намын дарга Н.Алтанхуягийгаа огцрохыг шаардаж эхэлсэн. Үүнтэй зэрэгцээд С.Одонтуяа гишүүн С.Эрдэнэ сайдыг шүүхэд өгч байгаагаа мэдэгдэвТодруулбал, сайд С.Эрдэнэ нь "Ажилласан жил, тэтгэврийн даатгалын шимтгэлийг нөхөн тооцох тухай хууль"-ийн төслийг санаачилж, УИХ-аар батлуулсан. Гэвч уг хуулийг хэрэгжүүлэхтэй холбогдуулан УИХ-ын гишүүн С.Одонтуяа С.Эрдэнэ сайдыг Захиргааны хэргийн шүүхэд өгсөн байна. С.Одонтуяа гишүүний хэлж буйгаар "1994 оноос өмнө дөрвөөс дээш хүүхэдтэй ээжүүд, 25 жил ажилласан цэргийн алба хаагчийг хүчээр шахам тэтгэвэрт гаргаж байсан. Тэдний ажилласан жил өөрийнх нь хүсэлтээс үл хамааран тасалдсан байдаг учир дээрх хуульд хамруулах ёстой” гэнэ. Гэтэл С.Одонтуяа гишүүний хэлсэн дээрх зүйлийг С.Эрдэнэ сайд үл тоож, тус хуульд оруулаагүй юм байна.
Шүүхэд өгсөн үндэслэлийг тэдний хэн хэн нь дээрхээс болсон гэж тайлбарлаж байгаа. Гэхдээ энэ хоёрын зөрчил өнгөн дээрээ “Ажилласан жил, тэтгэврийн даатгалын шимтгэлийг нөхөн тооцох тухай” хуулийн хэрэгжилтээс үүссэн гэж байгаа боловч цаанаа олон жилийн угшилтай хэрүүл, маргаанаас болсон гэнэ. Энэ хоёр хоёулаа Баянгол дүүргээс УИХ-д сонгогдсон гишүүд. Ер нь Баянголын гишүүд хоорондоо их зөрчилтэй хүмүүс. Сайд С.Эрдэнэ нэг хэсэг Х.Тэмүүжинтэй нилээн зөрчилтэй байсан.
2008 оны УИХ-ын сонгуульд С.Одонтуяа, С.Эрдэнэ нар Баянгол дүүргээс нэр дэвшсэн. Гэхдээ С.Одонтуяа УИХ-д сонгогдоогүй. Тухайн үеийн сонгуулийн санхүүжилт болон хамтарч ажиллахад гарсан зөрчлөөс болж С.Одонтуяа унасан гэдэг. Тэрбээр сонгуульд ялагдсан шалтгаанаа С.Эрдэнээс болсон гэж бодож явдаг тухай эх сурвалж хэлж байна. Нэг үгээр хэлбэл 2008 оны сонгуулиар хурцадсан зөрчлөө тэд иймэрхүү шалтагаар гаргаж ирж байгаа энэ аж.
Мөн С.Одонтуяа гишүүн саяхан хүүгийнхээ хуримыг хийсэн. Тэрбээр АН-ын нөлөө бүхий бүх гишүүдийг хүүгийнхээ хуриманд урихдаа С.Эрдэнэ сайдыг орхиж байв. Энэ мэт тэдний харилцаа хэрхэн зөрчилтэй байдгийг харуулах олон жишээ байна.
Муу ч МАН-ыг эрх барьж явахад УИХ-ын гишүүд бие биенээ шүүхэд өгч байсангүй. АН-ын дотоод зөрчилд МАН-аас хүч нэмэхгүй, өлгөж авахгүй, тоохгүй байхад ингэж дотроо зөрчилдөөд байгаа нь буруу үзэгдэл юм. Ойрын үед АН дотроо “Ёс зүйн дүрэмтэй болъё” гэж ярьж байгаа юм билээ. Ер нь Ёс зүйн дүрэмтэй болж, гишүүд нь намын дүрмээ хэрэгжүүлэх нь энэ намын ойрын хугацаанд хийх ёстой чухал ажил юм шиг байна.
24tsag.mn
Сэтгэгдэл (14)