Өчигдөрийн "АН-ын 4:11" уулзалтаар нэгэн ноцтой асуудлыг хөндөж тавилаа. АН-ын ерөнхий нарийн бичгийн дарга Ц.Оюундарь, Увс аймагт нэр дэвшсэн Т.Мэндсайхан, Д.Нямхүү нар Увс аймгийн дуулиан сонгуулийн эцсийн шийдвэрийг СЕХ эцэслэн шийдвэрлэхээр болсныг тайлбарласан юм. Гэхдээ МАН-аас нэр дэвшиж сонгогдсон Ч.Хүрэлбаатар, Б.Чойжилсүрэн хоёрыг эргүүлэн татах ёстой. Хэрвээ тэр хоёрыг эргүүлэн татаад зогсохгүй эрүүгийн хэрэгээр хорих үндэслэлтэй гэж тайлбарлав. Өөрөөр хэлбэл Ч.Хүрэлбаатар, Б.Чойжилсүрэн хоёрыг хууль зөрчсөн гэж үзвэл УИХ-ын гишүүнээс эргүүлэн татна.

    Энэ тухай Увс аймагт нэр дэвшиж ялагдчихаад өнөөг хүртэл маргалдаад байгаа АН-ын нэр дэвшигчид “Сонгуулийн хуулиар бол энэ хүмүүс төрийн эрх мэдлийг хууль бусаар булаан авахыг оролдсон гэдэг зүйл ангиар 5-10 жилийн ял байгаа. Тэгэхээр өдөр, шөнөгүй ингэж гүйхээс аргагүй. Хэрвээ буугаад ирэх юм бол шоронд орох байх л даа” хэмээн тайлбарлав. Өөрөөр хэлбэл АН-ын гомдогсод өрсөлдөгчдийгөө эргүүлэн татаад зогсохгүй эрүү үүсгэн шалгуулах өс хонзон өвөртөлжээ. Тэгэхдээ бүр төрийн эрх мэдлийг хууль бусаар булаан авахыг оролдсон гэж үзэн 5-10 жил хориулах хүсэлтэй байна.

    Ажиглагчидын тайлбараар бол СЕХ-ныхон АН-ын талд асуудлыг шийдвэрлэх магадлалтай гэнэ. Учир нь СЕХ-ны дарга болоод олонхи гишүүд нь эрх баригч АН-ын төлөөлөл аж. Тиймээс АН-ын гишүүд ингэж зоригтой дуугарч, МАН-ынханд эрүү үүсгэх ёстой гэж ил тод мэдэгдээд байгаа бололтой. Ингэх ч бас үндэслэл байгаа бололтой. Учир нь Ч.Хүрэлбаатар, Б.Чойжилсүрэн нарын туслах, сонгуулийн кампанит ажлын хүмүүс сонгогчдод мөнгө тараасан болохыг шүүхээр нотолж, нийт долоон хүн ял аваад байгаа аж. Тиймээс тэдгээрийн ард байсан эрхэмүүд ч ял авах ёстой гэж АН-ынхан үзэж заргаа авна гэдэгтээ итгэлтэй явна.

    Ийм үндэслэлээр АН-аас нэр дэвшигчид СЕХ-нд есдүгээр сарын 13-нд гомдол гаргасан. Харин СЕХ нэг сарын хугацаанд буюу аравдугаар сарын 13-ны дотор асуудлыг шийдвэрлэх хуулийн заалттай гэнэ. Ингээд СЕХ АН-ын талд эцсийн шийдвэрийг гаргавал МАН-ын хоёр гишүүн эргүүлэн татагдаад зогсохгүй аавын хаалга татахаар болов. АН-ынхан яг ингэж тайлбарлав.

    Ийнхүү бүтэн жил үргэлжилсэн Увсын маргаан эцэстээ МАН-ын хоёр гишүүнийг төрийн эрхийг булаан авахаар завдсан гэдэг үндэслэлээр аавын хаалга татуулснаар өндөрлөж магадгүй болсныг АН-ынхан зоригтой санууллаа.