УИХ дахь Ардын намын бүлгийн дарга Н.Энхболд Увсаас сонгогдсон УИХ-ын гишүүн Ч.Хүрэлбаатар, Б.Чойжилсүрэн нарын асуудлаар байр сууриа дөнгөж сая илэрхийллээ. Тэрбээр “Сүүлийн үед АН-аас Увс аймагт нэр дэвшээд сонгуульд ялагдсан зарим хүн манай намаас сонгогдоод бүрэн эрхээ хэрэгжүүлээд явж байгаа Ч.Хүрэлбаатар, Б.Чойжилсүрэн нарын талаар хэвлэл мэдээллийн хэрэгслээр ихээхэн буруу мэдээлэл явуулж байна.  СЕХ бол сонгуульд нэр дэвшсэн хүмүүсийг сонгуульд оролцож байгаа болон оролцсон байдал, дүнг нь гарган УИХ-д асуудлыг өргөн мэдүүлсэн. Үүгээр тэдний хийх ёстой ажил дуусдаг. Харин өнөөдрийн тохиолдолд хоёр гишүүнийг СЕХ-ноос ном журмынх нь дагуу өргөн мэдүүлээд, бүрэн эрхээ хэрэгжүүлсэн хойно нь янз бүрийн асуудал гарсан.  Шүүхээр шалгаад гишүүд буруугүй гэдэг нь тогтоогдчихсон. Гэтэл үүний хойноос дахин дахин улс төрийн үйл ажиллагаа явуулж, энэ гишүүдийг татах ёстой ч юм шиг ярьж байгаа нь огт буруу гэж хэлмээр байна. Ер нь сонгуулийн тойргийн хороотой холбоотой асуудал яригдаад, цэгцэрсэн. Тэгэхээр ийм асуудал байхгүй гэдгийг хариуцлагатайгаар мэдэгдэж байна. Манай хоёр гишүүн цаашид бүрэн эрхээ хэрэгжүүлээд явна. Харин буруу мэдээлэл тарааж буй АН-ын зарим удирдлага энэ үйл ажиллагаагаа зогсоох хэрэгтэй гэдгийг шаардаж байна” гэсэн юм. Тэрбээр ийн санал бодлоо илэрхийлсэн юм.