Ардчилсан намын удирдлагууд 2012 оны УИХ-ы сонгуулийн үер мөнгө тараасан Ч.Хүрэлбаатар, Б.Чойжилсүрэн нарын буруутайг шүүхээр эцэслэн тогтоосон гээд СЕХ-ноос шүүхийн шийдвэрийг биелүүлэх ёстой гэж өчигдөр мэдэгдсэн. Увсын хоёр гишүүний мандатыг хүчингүй болгох, эргүүлэн татах үгүйг СЕХ эцэслэн шийдвэрлэх ёстой гэсэн хуулийн заалт байгаа гэж АН-ын удирдлагууд хэлж байгаа юм. Тэгвэл энэ дагуу СЕХ  хуралдаж асуудлыг яг одоо шийдэж байна.

Үүнтэй зэрэгцээд МАН-ын удирдлагууд дөнгөж сая мэдээлэл хийлээ.

 МАН-ын Ерөнхий нарийн бичгийн дарга Г.Занданшатар энэ талаар ярихдаа “АН хууль, шүүх, үндсэн хуулийн дээр өөрсдийгөө тавьж Увсын хоёр гишүүнийг эргүүлэн татна, ял онооно гэж яллаж байгаа нь Ардчилсан болон үндсэн хуулийн зарчмуудыг зөрчиж байна. 2012 оны сонгуулиар Увс аймагт Б.Чойжилсүрэн, Ч.Хүрэлбаатар нар үнэмлэхүй ялалт байгуулж, түр үнэмлэхээ авсан. Сонгуулийн Ерөнхий хорооноос өргөн барьж УИХ-ын гишүүнийхээ бүрэн эрхийг хүлээн зөвшөөрүүлсэн. Харин Увс аймагт АН-аас нэр дэвшсэн Д.Мэндсайхан, Т.Нямхүү нар өргөдөл гаргаж, шүүхэд өгсөн. Ер нь удаа дараагийн бүх шатны шүүх хурлаас Увсын хоёр гишүүнийг буруугүй гэж шийдвэрлэсэн. Хамгийн сүүлд дээд шүүхээр  Б.Чойжилсүрэн, Ч.Хүрэлбаатар нар гэм буруугүй гэдэг нь тогтоогдсон. Монгол улсын үндсэн хуулинд шүүхээр гэм буруутайг нь тогтоогоогүй цагт хэнийг гэм буруутанд тооцож болохгүй гэж заасан байдаг. Гэтэл дөрвөн шатны шүүхээр гэм буруугүй нь тогтоогдсон байхад АН-ын бүлэг Увсын хоёр гишүүнийг татна гэж зарлаж байгаа нь Ардчилал, үндсэн хуулийн зарчмуудыг зөрчиж байгаа үйлдлийг гаргаж байна. Ардчилсан нам хуулийн заалтуудыг гуйвуулж, буруу мэдээлэл олон нийтэд цацаж байгаад харамсаж байна” гэв.

Тиймээс олныг төөрөгдүүлсэн худал мэдээллийг нийгэмд цацахаа болихыг албан ёсоор шаардаж байгаагаа тэрбээр онцолсон юм. УИХ-ын гишүүнийг эргүүлэн татах хуулийн заалт үндсэн хуульд огт байхгүй гэлээ.