Шинэчлэлийн Засгийн газрын үед боловсон хүчний бодлого ихээхэн алдагдаж байгааг хүн бүхэн ярьж эхэллээ. Тиймдээ ч АН-ыг “төрийн албыг төрлийн алба болголоо” хэмээн шүүмжлэх болсон. АН-ын томилгоо бүхэн энэ хэлц үгийг нотолж байна. Хамгийн сүүлийн Засгийн газрын хуралдаанаар дөрвөн оронд суух элчин сайдыг томилох шийдвэрийг гаргасан. Энэхүү томилгоо гадаад харилцааны салбарт ажиллаж ирсэн үе үеийн дипломатчдын дургүйцэл бухимдалыг ихээхэн төрүүлэх болсон талаар эх сурвалж мэдээллээ. Учир нь Франц улсад Мундагбаатарын Батсайхан, Германд Цолмонгийн Болор, Канадад Раднаабазарын Алтангэрэл, Швейцарьт Ваанчигийн Пүрэвдорж нарыг Монгол Улсаас суух Онц бөгөөд Бүрэн эрхт Элчин сайдаар томилуулахаар Монгол Улсын Ерөнхийлөгчид өргөн мэдүүлэхээр болсон юм. Эдгээр хүмүүсийг Засгийн газар томилохдоо “Гадаад харилцааны салбарт олон жил идэвх санаачилга, үр бүтээлтэй ажиллаж мэргэшсэн, удирдах ажлын дадлага туршлагатай улс орноо хилийн чанадад төлөөлөн ажиллах өндөр хариуцлагатай, нэр хүндтэй алба хаших бүрэн боломжтой гэж үзэж” байгаагаа онцлон зарласан юм. Гэвч ГХ-ны салбарт олон жил ажиллаж ирсэн ахмадууд, дунд үеийнхэн энэ тодорхойлолттой санал нийлэхгүй байна.

    Ялангуяа Швейцарьт элчин сайдаар томилогдсон В.Пүрэвдорж олон хүний гайхлыг төрүүлж байгаа бололтой. Тэрээр өмнө Швейцарьт томилогдон ажиллаж байгаад хугацаагаа сунгуулан аахар шаахар ажил хийж явжээ. Тэгээд л нэг л өдөр Элчин сайдаар томилогдохоор болоод гараад ирсэн нь гадаад харилцааны яамныханы амны зугаа болжээ. Түүний элчин сайд болох ганц шалгуур нь УИХ-ын гишүүн С.Дэмбэрэлийн хамаатан гэнэ. Өөрөөр хэлбэл энэ засгийн гол шалгуур болсон “хамаатан” гэдэг ангилалд нийцсэн учраас ингэж өндрөө авсан гэж яригдаж байна. Ерөнхий сайд Н.Алтанхуяг бие даагч гишүүн Х.Болорчулууны дүүг “Монрос”-ын захиралаар, Ц.Даваасүрэн гишүүний дүүг Татварын ерөнхий газрын дэд даргаар томилсон. Үлдсэн ганц бие даагч болох С.Ганбаатарын дүүг төрийн өмчит нэгэн томоохон үйлдвэрийн захирал болгохоор тохиролцсон гэж баахан шуугисан. Ингэж Шинэчлэлийн Засгийн газрынхан бие даагчдыг тогтоон барьж дөнгөсөн. Харин одоо хамтарч Засгийн газар барьж байгаа ИЗНН-ын С.Дэмбэрэл гишүүний хамаатныг элчин сайд болгоод “дуугай” байлгах аргаа олсон бололтой.

    ГХ-ны яамныхны хамгийн их бухимдлыг төрүүлсэн дараагийн томилгооны эзэн бол Франц улсад суух онц бөгөөд бүрэн эрхт элчин сайд Мундагбаатарын Батсайхан аж. Тэр бас УИХ-ын гишүүн Б.Болор гэж “чимээгүй” гишүүний “тун сайн найз” гэдэг ангилалаар элчин сайд болох виза даруулжээ. Саяхан Франц дахь элчин сайдын яаманд ажиллаж байгаад ирсэн нэгэн аж. Хамгийн гол нь УИХ-ын гишүүдийн “хамаатан, найз” гэдэг ангилалаар томилогдож байгаа эдгээр Элчин сайдууд гуч гаруй насны залуус байгаа нь ГХЯ-ныхны бухимдлыг төрүүлэх нэг том шалтгаан болжээ. Насаараа энэ яаманд, гадаад харилцааны системд ажиллаад томилогдож чадахгүй байхад нь дарга нарын хамаатан, найз залуус томилогдоод дэргэдүүр нь салхи татуулан инээж алхаад байхаар бухимдахаас ч яахав дээ. Үүнийг л АН-ын боловсон хүчний бодлогын алдаа гэж олон түмэн тодорхойлоод байгаа билээ.

    Үүнээс гадна ГХЯ-ны газрын дарга нар гэж сайд, гишүүдийн хамаатан гэдгээрээ онцгойрдог гуч гаруй насны хэдэн залуус бий гэнэ. Тэд ч бас бид дараагийн элчин сайдууд хэмээн ахмад дипломатчдын  аазгайг хөдөлгөдөг аж.

    С.Батболдын Засгийн газрын үед 11 яам, 929 төрийн албан хаагчидтай байсан. Харин нь Н.Алтанхуяг яамдын тоог 16 болгож, төрийн албан хаагчдын тоог 1625 болгож нэмэгдүүлсэн. Эдгээр яамдыг УИХ-ын гишүүн, сайд, дарга нарын хамаатан садан, нутаг усныхан дүүргэсэн гэж хэвлэлүүд олонтоо бичсэн. Тэгвэл Шинэчлэлийн Засгийн газрынхан дотоод дахь төрийн албан хаагчдыг хамаатнуудаараа дүүргээд хилийн чинад дахь элчин сайдын яамдыг ах дүүс, найз нөхөдөөрөө дүүргэх их аяныг ийнхүү эхлүүллээ. Бид гадаад дахь Монголын элчин сайдын яамдуудад ажиллаж байгаа эрх баригчдын хамаатан, ах дүүс, найз нөхөдийн мэдээллийг нэг бүрчлэн мэдээлэх болно.