Н.Алтанхуяг сайдын Засгийн газар нээлттэй болох гэж ихэд хичээж байна. Сайд нар долоо хоног бүр мэдээлэл хийж, Ерөнхий сайд ч өөрийн гэсэн “30 минут”-тай болсон. Энэ хэрээр Засгийн газрын ажил олон нийтэд ойлгомжтой байх байтал энэ мэдээллийн цагууд тулга тойрсон сэдвээр дүүрэх боллоо. Ерөнхий сайд Н.Алтанхуяг мэдээлэл хийх болгондоо энэ Засгийн газарт хир халдаахгүй гэж Сү.Батболдын Засгийн газар хэрхэн “муу” ажилласан талаар хангалттай ярьж байна. Тэрбээр Таван толгой, Оюутолгойн асуудал, эдийн засгийн байдал хүндэрсэн нь өмнөх Засгийн газартай холбоотой гэж дахин дахин мэдэгдсэн ч төдийлөн үр дүнд хүрээгүй.

   Тэгвэл Ерөнхий сайд саяхнаас энэ бүхэнд “Рио Тинто” компани буруутай гэх үгийг байн байн амнаасаа унагах боллоо. Түүний хэлж буйгаар Монголын Засгийн газар Оюутолгойн төслийг явуулахгүй, гацааж байгаа гэх мэдээллийг “Рио Тинто” дэлхий нийтэд зарлаад яваа гэх. Энэ буруу ойлголтоос салгахын тулд Ерөнхий сайд маань “Рио Тинто”-гийн муу муухайг зарлаж яваа бололтой.  Тэрбээр “Рио Тинто” компани манай хүмүүсийн явуулсан бичиг цаасыг ашиглаад наадмын дараа хувьцааны үнэ огцом унасан. Энэ үйлдэл нь Монголын талд ашиггүй зүйл байсан ч бусдад нь ашигтай байсаар байгаа” гэв. Мөн “Оюутолгой бол зөвхөн Монголын Засгийн газар, “Рио Тинто”-гийнх биш. “Рио Тинто”-гийн эзэмшдэг 64 хувь дотор 50 орчим хувийг нь өөр компаниуд эзэмшдэг” хэмээн тодотголоо. Өөрөөр хэлбэл "Рио Тинто"  ингэж “томроод” байх шаардлагагүй гэх санааг үгэндээ тээж байгаа бололтой. Ерөнхий сайд ийнхүү гацсан “Оюутолгой”-н төслийн бурууг “Рио Тинто”-д тохож байна.
 
  Харин Ерөнхий сайд хамтрагчаа ингэж муулах нь хэр зохистой вэ гэсэн асуудал яригдаж эхлээд байна. Бизнесийн соёл, улс төрчийн ёс зүйн хувь ч сайн зүйл үү? хэмээн асууцгааж байна. Түүнтэй хамт өмнөх Засгийн газарт багтаж байсан Эрүүл мэндийн сайд асан С.Ламбаа “Миний бодлоо Ерөнхий сайд асуудлыг өөр дээрээ хэт төвлөрүүлээд байх шиг. Ардчилсан нам өмнөх засагт хамтарч, таван сайдтайгаа Засгийн газарт орж ажилласан. Тийм байхад Ерөнхий сайд өмнөх Засгийн газраас болж зовж зүдэрч байна гэж ярих хэрэггүй. Ийм сэтгэлгээгээр асуудалд хандах нь цэвэр үлдэх биш харин ч нийгэмд өөрсдөө бохир болж харагдана гэдгийг ойлгох хэрэгтэй. Өөрийгөө өрөвдүүлэх зарчмаар ажиллах нь тийм ч сайн тактик биш” хэмээжээ.
   Үнэхээр Ерөнхий сайд маань нуухыг нь авах гээд нүдийг нь сохлов гэдэг шиг гацсан “Оюутолгойг” аврах гээд “Рио Тинто”-Монголын харилцааг улам муутгах вий дээ хэмээн болгоомжлох нэгэн байна. Ерөнхий сайд маань ер нь хэлэх үгэндээ үнэлэлт, дүгнэлт хийх болсон юм шиг...