МАН-ыг таван сонгууль дараалан ялагдсаны маргааш удирдлагад нь ажиллаж байсан баахан залуус удирдлагуудаа огцрохыг шаардаж, шинэчлэгчид болон гарч ирсэн. Харамсалтай нь тэднийг нийгэм сайхнаар хүлээж аваагүй. Учир нь өөрсдөө удирдлагад нь байж ингэж загнах нь увайгүй л хүмүүсээс гарах араншин гэж олон нийт дүгнэсэн.

    Харин тэд намынхаа удирдлагад үлдэх биш дарга болно гэж ярьцгааж байна. Өнгөрсөн хагас бүтэн сайн өдөр МАН-ынхан удахгүй болох XXVII Их хурлынхаа төлөөлөгчдийг орон даяар сонгоод дуусаж. Эх сурвалжийн мэдээлж байгаагаар бол 1100 орчим төлөөлөгчийг сонгосон байна. Гэтэл Их хурлын төлөөлөгчөөр сонгогдсон 1100 хүн чимээгүй байхад л Шинэчлэлийн хорооны хэдэн залуус л “бид гарчихлаа”, “их хурлын төлөөлөгч болчихлоо” гэж өөрсдийгөө зогсоо зайгүй сурталчилж байна.

    Үүгээр ч зогсохгүй Шинэчлэлийн хорооныхон өөрсдийгөө намын томоохон албан тушаалуудыг авна гэдгээ ил тод зарлаж явна. Тухайлбал Шинэчлэлийн хорооныхон Т.Аюурсайханыгаа МАН-ын даргад өрсөлдүүлэхээ Сүхбаатар аймгийн Сүхбаатар суманд очиж зарлахаар зүүн зүгийг зорилоо гэсэн мэдээллүүдийг хэвлэлүүдээр зориуд тарааж сууна. Учир нь тэд билэгдэлийг бодож МАН-ыг үүсгэн байгуулагчдын нэг Д.Сүхбаатарын төрсөн нутагаас Т.Аюурсайхныгаа намын даргад өрсөлдүүлэх гэж байгаагаа ард түмэнд сонордуулж шоу хийх гэнэ.  Мөн Шинэчлэлийн хорооны гишүүн Ж.Мөнхбатыгаа ерөнхий нарийн бичгийн дарга, ерөнхий зохицуулагч Б.Ганхуягийгаа орон нутаг хариуцсан нарийн бичгийн даргад, Н.Батсүмбэрэлийг Хотын намын хорооны даргад өрсөлдүүлнэ гэж ярилцжээ. Тэгээд Т.Аюурсайхныгаа даргад өрсөлдүүлнэ гэж эхлэж зарлаад дараа нь Ж.Мөнхбат гэх мэтээр өдөр бүрээр шинэ мэдээлэлээр намын гишүүддээ сюрприз барих гэнэ.

    Ийнхүү Их хурлын төлөөлөгч боллоо гэж өөрсдийгөө сурталчилах залуус МАН-ын гол удирдлагуудыг авахаар санаархаж байна. Харин намынх нь ах нар тэдний санаачлагыг сонсоод ихэд жуумалзах болсон гэж эх сурвалж мэдээллээ. Мэдээж тэдний хэнийг нь ч гэсэн ногоон гэрлээр дарга болгохгүй нь тодорхой. Учир нь МАН-д тохиолдолын зүйл гэж хэзээ ч байгаагүй. Энэ удаа ч тийм юм байхгүй биз. Ийм байхад өөрсдийгөө даргад нэр дэвшүүллээ гэж ээлж дараалан зарлаж онигоонд орох залуус нийгмийнхээ байг гэхэд намынхаа гишүүдийн сэтгэл зүйг мэдэхгүй савсагнах нь улам л эмгэнэлийнх нь тоог нэмж байна.

    Гэхдээ МАН-ын Шинэчлэлийн хорооныхон ихээхэн хөрөнгөтэй байна. Үнэтэй машин хөлөглөж бүх аймгийг тойрч ухуулга сурталчилгаа хийж яваа тэднийг хэн санхүүжүүлээд байна вэ гэдэг ихээхэн анхаарал татах болов.

    1980-аад оны залуусыг ингэж хөөргөнтөж явах хойгуур намынх нь удирдлагууд М.Энхболдыг дэмжих сураг гарав. Харин нийгэм 1970 аад оны төлөөлөл болох Ж.Сүхбаатар, Д.Цогтбаатар, C.Бямбацогт, Ж.Энхбаяр гэх мэт залуусыг үгүйлж байна.