Ойрын хэдэн жил яригдах улс төрийн хамгийн дуулиантай сэдэв бол Ерөнхийлөгч асан Н.Энхбаярыг АТГ-аас баривчилсан үйл явдал. Н.Энхбаярыг хэрхэн оймсыг нь гозолзуулан баривчилж байгааг телевизээр шууд дамжуулж, гэрт нь байсан УИХ-ын гишүүдийн биед хэрхэн халдсныг олон нийт харсан.
     Өнөөдөр Н.Энхбаяр уучлалаар суллагдаж, Солонгост эмчлүүлж байгаа ч энэ хэрэгтэй холбоотой асуудлууд дуусаагүй байна. АТГ, цагдаа, хүчнийхэн түүнийг баривчлахдаа, байцаан шүүхдээ хүний эрхийг удаа дараа зөрчсөн гэх гомдол ХЭҮК-т ирсэн байна. Бүр тодруулбал Н.Энхбаярыг баривчлах явцад эрүүдэн шүүхийн эсрэг олон улсын конвенци болон  Монгол улсын хуулийн  тодорхой заалтуудыг зөрчлөө гэсэн гомдол ирсэн аж.

Энэ дагуу гомдлыг  ХЭҮК-ийнхон УЕПГ-ын дэргэдэх Мөрдөн байцаах албанд шилжүүлжээ. Өөрөөр хэлбэл Н.Энхбаярт хүч хэрэглэж, эрхэд нь халдсан албан тушаалтнуудыг шалгаж, хариуцлага тооцох асуудал аль эртнээс яригдаж эхэлсэн байна. Дээрх дуулиант баривчилгааны үеэр Н.Энхбаярын эрхийг зөрчсөн үйлдлүүд гарсан гэдгийг ХЭҮК-ын дарга, түүнтэй нэг үе улс төрийн тогоонд хамт байсан Ж.Бямбадорж хэлж байна. ХЭҮК гомдол хүлээж авдаг болохоос мөрдөн байцаалтын явцыг шалгах эрхгүй байдаг тул ийнхүү Мөрдөн байцаах албанд шилжүүлээд байгаа аж.

     МАХН-ын гишүүд ч Н.Энхбаярын эрхэнд цагаа, хүчнийхэн халдсан гэх асуудлыг шийдэж өгөхийг шахаж, шаардаж байгаа аж. Бүр баривчилгаанд оролцсон хүмүүсийн нэрийг гаргаж өгөхийг хүссэн гомдол ирсэн тухай ч яриа байна.

    Гэсэн ч одоогоор гомдлыг шалгах ёстой УПЕГ-ын дэргэдэх Мөрдөн байцаах газар шалгалт явуулсан эсэх, ямар үр дүн гарсан талаар ямар нэгэн мэдээлэл өгөхгүй байгаа аж. Эх сурвалжийн мэдээлж байгаагаар Н.Энхбаяр биеэ тэнхрүүлээд Монголд ирвэл зайлшгүй энэ асуудлыг хөндөж, зөрчигдсөн эрхээ “нэхэхээр” төлөвлөж байгаа бололтой. Энэ нь түүний эргээд улс төрд, олон нийтийн анхаарлыг татах сэдэв болохыг үгүйсгэх аргагүй юм. Ямартаа ч ХЭҮК Н.Энхбаярын эрхийг зөрчсөн асуудлыг дараад өнгөрөх биш, албан тушаалтнуудыг шалгаж, хариуцлага тооцохыг сануулсаар байгаа аж.