Өмнөх Засгийн газрын хийж, хэрэгжүүлж байсан ажлууд эдийн засаг хүндрэхэд нөлөөлсөн гэж Шинэчлэлийн Засгийн газрын сайд нар ярьдаг. Сү.Батболдын Засгийн газрын алдааг бид үүрч, засах гэж байна хэмээн сүржин мэдэгдсээр ирсэн. Тэгвэл Н.Алтанхуягийн Засгийн газар ингэж ярьсан хэрнээ өмнөх Засгийн газрын хэрэгжүүлэхээр төлөвлөж байсан бодлогыг хуулбарлаж эхэллээ. Тэд одоо л төрийн бодлогын залгамж халаа гэж байдаг тухай бодож эхэлсэн бололтой.

   Сү.Батболд Ерөнхий сайд байхдаа дэд бүтцийн салбарыг хөгжүүлэх “Монгол төмөр”, “Монгол зам”, “Монгол дэд бүтэц”, “Монголын төмөр зам” гэсэн хөтөлбөрүүдийг хэрэгжүүлэх зорилт дэвшүүлж байсан. Эдгээр томоохон төслүүдийн зарим нь хэрэгжиж эхлээд байсан ч засаг солигдож орхисон юм. Харин Н.Алтанхуягийн Засгийн газар өмнөх Засгийн газрын боловсруулсан дээрх хөтөлбөрүүдээс хэрэгжүүлэхээ сүржин зарлаж эхлээд байна.

    Эхний ээлжинд Уул уурхайн яам, Эдийн засгийн хөгжлийн яам, Үйлдвэр хөдөө аж ахуйн яам хамтарч “Монгол төмөр”, “Монгол зэс” хөтөлбөрийг хэрэгжүүлэх гэж байна. “Монгол төмөр” төслөөр төмөрлөгийн уурхайнуудад нойтон баяжуулах, төмөр хайлуулах үйлдвэрүүд барина. Мөн Дарханы төмөрлөгийн үйлдвэрийн уурхайг ашиглан төмрийн дотоод хэрэгцээг хангах аж. Энэ төсөл амжилттай хэрэгжвэл ердөө 2-3 жилийн дараа гаднаас төмөр импортлохоо больж, гангийнхаа хэрэгцээг дотоодоос бүрэн хангах боломжтой болох юм. Эх сурвалжийн мэдээлж байгаагаар “Монгол төмөр” хөтөлбөр Сү.Батболдын үед нэлээн үнэтэй санал санаачлагад тооцогдож, Ерөнхий сайдын тавьсан гол зорилтуудын нэг болж байжээ. Тэрбээр “Манай Засгийн га¬зар шинээр тавих төмөр замын 51 хувь нь төрийн мэдэлд байх ёстой. Үлдсэн 49 хувийг нь стра¬тегийн хөрөнгө оруулагчдыг татах хэлбэрээр тэдэнд эзэмшүүлье гэж шийдэж байсан. Энэ засаг ярьж, ярьж эргээд бидний хамтаараа шийдсэн шийдвэр дээр буулаа гэж ойлгож байгаа. Өмнөхөө үгүйсгэж суух зав Засгийн газарт байдаггүй” хэмээж байв.

   Харин Н.Алтанхуягийн Шинэчлэлийн Засгийн газрынхан муулж байсан хүмүүсийнхээ бодлогыг хэрэгжүүлэх нь зүйтэй гэж харжээ. Сайн ажлыг болохоор хамтарсан Засгийн газрын ажил гэж нэрлээд, муу муухай болгоныг өмнөх рүүгээ чихэхээ болих хэрэгтэй гэдгийг энэ дэд бүтцийн төслүүд тэдэнд сануулсан бололтой. Бүх зүйл гэнэт Шинэчлэлийн Засгийн газрын буянаар хийгдсэн мэтээр ярьдагаа болих хэрэгтэйг ч харуулж байна. Ямартаа ч үр дүн сайтай, өр өгөөжтэй гэх “Монгол төмөр” хөтөлбөрийг зөвхөн бидний хийсэн ажил гээд цээжээ дэлдэж болохгүйг энэ Засгийн газрын сайд нар ойлгоосой. Өмнөх Засгийн газарт ажиллаж энэ төслийг хэрэгжүүлэхээр зүтгэж явсан олон хүн харж байна.