“Шударга ёс” бүлгэм иргэний байгууллага нь Монголын нийгмийн амьдралын бүх хүрээнд ажиглалт, дүн шинжилгээ хийж ирсэн туршлага дээрээ үндэслэн Шинэчлэлийн Засгийн газрын 2012-2013 оны үйл ажиллагаанд үнэлэлт дүгнэлт өгч байна.
    УИХ-ын ээлжит сонгуулийн үр дүнд шинээр байгуулагдсан Засгийн газрын үйл ажиллагааны мөрийн хөтөлбөр нь 4 жилийн хугацаанд хэрэгжих ёстой. Гэхдээ Шинэчлэлийн Засгийн газрын бүрэн бүрэлдэхүүнээрээ ажиллаж эхэлсэн эхний жил нь цаашдынх нь үйл ажиллагааны ерөнхий төлөвийг тодорхойлж чадаж байна.

    Нэг: Шинэчлэлийн Засгийн газрын үйл ажиллагааны эхлэл:
    1. 2004 оноос хойш анх удаа Үндсэн хуулийн агуулга, үзэл санааны дагуу УИХ-ын сонгуулийн үр дүнгээр байгуулагдсан Засгийн газар нь Н.Алтанхуягийн удирдсан Шинэчлэлийн Засгийн газар мөн. Үүнээс өмнөх Засгийн газрууд нь сонгогч олон түмний сонголтыг харгалзахаасаа илүү эрх баригч, сөрөг хүчин болсон хоёр том намын хамтарсан засаглал байсан нь ардчиллын зарчимд харшилж байв. Шинэчлэлийн Засгийн газрын энэ давуу тал нь үйл ажиллагаагаа амжилттай эхлэх чухал хөшүүрэг боллоо.
    2. Шинэчлэлийн Засгийн газар байгуулагдсан мөчөөсөө эхлэн ард иргэддээ нээлттэй, ил тод байхыг эрхэмлэж Төрийн ёслол хүндэтгэлийн өргөөг нээлттэй болгох, 11-11 төвд иргэдийн санал хүсэлтийг хүлээн авч шийдвэрлэх, Засгийн газрын гишүүдээс иргэдтэй нээлттэй уулзах гэх мэт олон ажлыг зохион байгуулсан нь төр засаг, иргэдийн хамтын ажиллагааг ойртуулж өглөө.
    3. Шинэчлэлийн Засгийн газар эхнээсээ ажил хэрэгч, шуурхай байдлыг зарчим болгож иржээ. Тухайлбал: Чингис боондын хөрөнгө оруулалт, хөдөлмөрийн хөлсний доод хэмжээг нэмсэн, иргэдийн хэрэгцээний нүүрс хүргэлтийг оновчтой зохион байгуулсан зэргийг дурдаж болно. Ажилласан жил, тэтгэврийн даатгалын шимтгэлийг нөхөн тооцсон богино хугацааны үйл ажиллагааны хүрээнд гэхэд л 500 мянган иргэний асуудлыг шуурхай шийджээ.

    Хоёр:  Шинэчлэлийн Засгийн газрын үйл ажиллагааны өрнөл:
    1. Улс орон даяар дэд бүтцийн бүтээн байгуулалтын чиглэлээр их ажил өрнөж байгаа нь Шинэчлэлийн Засгийн газрын өмнөх Засгийн газруудаасаа товойн харагдах нэг онцлог болж байна. Аймгуудыг холбох хар зам, нийслэлийн зам гудамж, Буянт-Ухаа, Баянголын амны инженерийн шугам сүлжээ, цахилгаан станцууд барих асуудлыг шийдсэн гэх мэт.
    2. Нийслэл, аймаг, сум, дүүргийн төсөвт өгөх хөрөнгө оруулалтын хэмжээг өсгөж, төсөвт хяналт тавих иргэдийн оролцоог нэмэгдүүлсэнээр орон нутгийн хөгжилд сайн нөлөө үзүүлж эхэллээ.
    3. Шинэчлэлийн Засгийн газрын яам, агентлагууд өөр өөрсдийн салбарын үйл ажиллагаанд хийх шинэчлэлээ тодорхойлж чадсан нь бас нэг дэвшил, гэхдээ энэ талаар дүгнэлт хийх цаг хараахан болоогүй нь ойлгомжтой. Шинэчлэлийн Засгийн газар үйл ажиллагааныхаа эхлэлийн шатнаас салж, өрнөлийн шатандаа идэвхтэй ажиллаж байгаа гэж дүгнэж болохоор байна.

    Гурав: Шинэчлэлийн Засгийн газрын үйл ажиллагаанд өгөх үнэлэлт, дүгнэлт:
    1. Шинэчлэлийн Засгийн газрын 2012-1013 оны үйл ажиллагааг хангалттай сайн гэж үнэлж байна. Өнөөгийн Монголын нийгэмд хуримтлагдсан шийдэгдээгүй асуудал олон байгаа боловч, нэг жил гаруйхан хугацаанд ажиллаж буй Шинэчлэлийн Засгийн газар чамлахааргүй ажил амжуулжээ.
    2. Гадаад зах зээл дээрх манай ашигт малтмал, ялангуяа нүүрсний үнийн уналтаас шалтгаалан гарч ирсэн төсөв дэх цоорхойг Шинэчлэлийн Засгийн газартай холбон шууд буруутгах аргагүй. Өнгөрсөн жилүүдэд дэлхийн зах зээл дээрх ашигт малтмалын үнийн өсөлтийн дүнд гарч байсан эдийн засгийн таатай нөхцөлд буруу ажиллаж ирсэний гор одоо гарч ирж байгааг ч хэлэх ёстой.
    3. Шинэчлэлийн Засгийн газрын үйл ажиллагааг сайнаар үнэлж байгаа нь өөгүй сайн ажиллаж байгаа гэсэн үг биш, улам эрч хүчтэй сайн ажиллах урмын үг гэж ойлгох хэрэгтэй. Инфляцийн түвшинтэй уялдуулан, иргэдийн ашиг орлогыг нэмэгдүүлэх оновчтой хувилбарыг сонгож олох шаардлагатай байна.