2014 оны төсвийн төслөөс танаж, хасах хэрэгтэй гэж Ерөнхий сайд Н.Алтанхуяг мэдэгдсэн ч зайлшгүй нэмэгдэх ёстой зардал байгааг танилцууллаа. Энэ жил иргэдийн цалин, тэтгэвэр, тэтгэмжийг нэмэхээр төлөвлөсөн байгаа тул 200 тэрбум орчим төгрөгийг нэмж нөөцлөхөөр тусгасан байга аж. Гэхдээ цалин, тэтгэврийг яг хэзээнээс нэмэх хугацааг тогтоохгүй аж. Учир нь хугацааг нь нийтэд зарлахаар барааны үнэ нэмэгдчихдэг. Тиймээс Засгийн газрын мөрийн хөтөлбөрийн дагуу цалин, тэтгэврийг нэмнэ гэлээ. Мөн Ерөнхий боловсролын сургуулийн хүүхдүүдийн тоо эрс нэмэгдсэн тул Боловсролын салбарт 34 тэрбум төгрөг нэмж төсөвлөх шаардлагатай болсон байна. Үүнээс гадна Эрүүл мэндийн салбарт 44 тэрбум төгрөг,  Тэтгэврийн даатгалын шимтгэлийг нэмэхэд 34 тэрбум төгрөг, Арьс ширний урамшуулалд 24 тэрбум гээд нийт 450 тэрбум төгрөгийг 2014 оны төсөвт зайлшгүй нэмж тусгах ёстой байгааг хэллээ.