УИХ-ын өнөөдрийн чуулган завсарлалаа. Хуралдаанаар Монгол улсын 2014 оны төсвийн төслийг хэлэлцэж, гишүүдээс тал бүрийн санал гарлаа. МАН-ын гишүүд ирэх жилийн төсвийг өр, алдагдал ихтэй төсөв болох нь хэмээн шүүмжилсэн юм. Тухайлбал УИХ-ын гишүүн Ж.Эрдэнэбат "Өнөөдөр Монгол улсын дотоод, гадаад өр тамтагаа алдах нь. Төсвийн тухай хуульд үнэт цаасыг 1,4 их наяд төгрөгөөр арилжаална гэж тооцсон байна. Дотоод өрийг гэхэд л нэг их наядаар өсгөлөө. Чингис бондын мөнгийг Монгол улсын өр гэж төсөвтөө оруулж тооцохгүй байгаад гайхаж байна. Энэ мөнгө төсөвт сууж байж бид нийт гүйцэтгэлээ ярих ёстой. 2012 онд хамтарсан Засгийн газар өмнөхөөсөө 2,4 их наядаар их төсөв баталж байсан. Үнэ бууруулах хөтөлбөр гэж 3 их наяд төгрөг гаргасан нь буурахгүй байна. Үүнээс болоод үнэ өсөөд байна" гэлээ.

    Ийнхүү өнөөдрийн үдээс өмнөх чуулган завсарлалаа. УИХ-ын нэгдсэн чуулган 14.00 цагт гишүүдийн асуултаар үргэлжлэх юм.