Монгол Улсын ЭСЯ анх ЗХУ-д (хуучнаар) байгуулагдсаны 90 жилийн ойг тохиолдуулж Ахмад дипломатч, шинжлэх ухааны доктор, профессор Ц.Гүрбадамын  “Хүндэт дипломатчийн хүүрнэл”  ном хэвлэгдлээ.

Ц.Гүрбадам нь Монгол-Зөвлөлтийн харилцааны хамгийн эгзэгтэй, эрс  шинэчлэлийн он жилүүд болох 1984-1990 онд ЗХУ-д Онц бөгөөд Бүрэн эрхт Элчин сайдаар ажиллаж байсан бөгөөд уг номонд ЗХУ-ын тухайн цаг үеийн нөхцөл байдал, ах дүүгийн найрамдалт харилцаанд гарсан өөрчлөлт, үе үеийн монгол дипломатчдын оруулсан хувь нэмэр зэрэг түүхийн давтагдашгүй үйл явдлууд баримт тайлбартайгаа хүүрнэл яриа хэлбэрээр тусгагджээ.

Элчин сайд Ц.Гүрбадамын хойд хөршид эх орноо төлөөлөн сууж асан тухайн цаг үеийг ЗХУ-ын төдийгүй Монголын түүхээс ангид авч үзэх боломжгүй юм. Чухам тэр үеэс хоёр улсын хооронд улс төр, нийгэм, эдийн засгийн шинэ хэлбэрийн харилцааны суурь тавигдсан бөгөөд энэ түүхэн үйл явцын эргэн тойронд өрнөсөн  “амьд” яриа, тэмдэглэл, гэрээ хэлэлцээ, айлчлал, уулзалт, баримт бичиг,  мэдээллүүдтэй “Хүндэт дипломатчийн хүүрнэл” номоор танилцаж болох аж.