Монгол Улсын Их Хурлын дарга Зандаахүүгийн Энхболд Бүгд Найрамдах Турк Улсын Үндэсний Их Хурал (ҮИХ)-ын дарга Жэмил Чичекийн урилгаар тус улсад албан ёсны айлчлал хийхээр 2013 оны 10 дугаар сарын 9-ний орой Анкара хотод хүрэлцэн ирэв.

   УИХ-ын дарга мөн сарын 10-ны өглөө БНТУ-ыг үндэслэн байгуулагч, тус улсын анхны Ерөнхийлөгч Ататүркийн бунханд цэцэг өргөж хүндэтгэл үзүүлснээр албан ёсны айлчлалаа эхлэв. Тэрбээр Ататүркийн дурсгалын цогцолбор дахь Тусгаар тогтнолын төлөөх дайны музейг үзэж, хүндэтгэлийн дэвтэрт сэтгэгдлээ бичиж үлдээв.

  УИХ-ын дарга З.Энхболд мөн өдөр БНТУ-ын ҮИХ-ын дарга Ж.Чичектэй ганцаарчилсан уулзалт хийж, хоёр улсын болон парламент хоорондын харилцаа, хамтын ажиллагааны талаар ярилцав.

 Дараа нь З.Энхболд, Ж.Чичек нарын тэргүүлсэн Монгол, Туркийн парламентын төлөөлөгчдийн өргөтгөсөн хэлэлцээ болов. Монгол, Турк хоёр улс төр, нийгмийн ардчилсан тогтолцоо, парламентын засаглалтай улсууд учир хоёр улсын харилцаанд парламентууд чухал үүрэг гүйцэтгэх ёстойг З.Энхболд тэмдэглээд хоёр талын түүхэн уламжлалт, найрсаг харилцааг өргөтгөн хөгжүүлэх улс төр, хууль, эрх зүйн үндсийг бэхжүүлэх, Туркийн хууль тогтоомжуудын дэвшилттэй, шинэлэг зүйлсийг судлан нэвтрүүлэх, парламент дахь найрамдлын бүлгүүд болон Тамгын газруудын харилцааг тогтмолжуулах, парламент хоорондын харилцан айлчлалын давтамжийг хадгалах зэрэг асуудлыг хөндөж тавив.

  Мөн хоёр улсын худалдаа, эдийн засгийн харилцааг өргөтгөх, тухайлбал, орон сууцны барилга барихад зориулж Туркээс хөнгөлөлттэй зээл, шинэ дэвшилтэт технологи авах, арьс шир боловсруулах, аялал жуулчлалыг нэмэгдүүлэх, Хархорины нисэх буудлыг шинэчлэхэд хамтран ажиллах санал тавилаа.

 Туркийн ҮИХ-ын дарга Ж.Чичек хоёр улсын ах дүүгийн харилцааг хөгжүүлэхэд тус улсын парламент онцгой анхаарч ажиллана гэдгийг тэмдэглээд хоёр талын худалдаа, эдийн засгийн болон парламент хоорондын харилцаа, хамтын ажиллагааг хөгжүүлэх талаархи Монголын талын саналыг бүрэн дэмжиж байгаагаа илэрхийлэв.

  Хэлэлцээнд монголын талаас УИХ-ын гишүүн, УИХ дахь Монгол, Туркийн парламентын бүлгийн дарга А.Бакей, УИХ-ын гишүүн Д.Батцогт, Д.Сарангэрэл болон Монгол Улсаас БНТУ-д суугаа Онц бөгөөд Бүрэн эрхт Элчин сайд Б.Батхишиг, туркийн талаас ҮИХ-ын Гадаад бодлогын байнгын хорооны дарга, Элчин сайд Волкан Бозкир, ҮИХ-ын Ерөнхий нарийн бичгийн дарга Ирфан Незиролу, БНТУ-аас Монгол Улсад суух Онц бөгөөд Бүрэн эрхт Элчин сайд Мурат Карагөлз, ҮИХ-ын Гадаад харилцааны хэлтсийн дарга Бахадир Якут нар оролцов.

  Хэлэлцээний дараа “Иргэд харилцаан зорчих тухай Монгол Улсын Засгийн газар, БНТУ-ын Засгийн газар хоорондын хэлэлцээр”-т монголын талаас Онц бөгөөд Бүрэн эрхт Элчин сайд Б.Батхишиг, туркийн талаас ГХЯ-ны Консулын газрын Ерөнхий захирал, Элчин сайд Шакир Факили нар гарын үсэг зурлаа.

  Туркийн ҮИХ-ын дарга Ж.Чичек, гэргий Гүлтэн Чичек нар УИХ-ын дарга З.Энхболд, гэргий Т.Бат-Өлзий нарт болон төлөөлөгчдөд хүндэтгэлийн зоог барилаа гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.