Үе үе дуулиан тарьдаг “Хас”-ын Ч.Ганхуяг удахгүй болох МАН-ын Их хурлын төлөөлөгчөөс хасагдаад байна. Түүнд энэ талаар албан ёсоор мэдэгдэлгүй МАН-ын дүрмийг өөрчлөх, шинэ дарга сонгох чухал хуралд суулгахгүй болсонд тэрбээр ихэд бухимдаж байгаа аж. Ч.Ганхуяг нэгэн цагт Сангийн дэд сайдын алба хашиж явсан. Талхны үнэ мэдэхгүйгээсээ болж нэр хүндээ унагаж, сонгуульд ялагдсан тэрбээр саяхан Төрийн ордон руу салаавч гаргаж дуулиан тарьсан билээ. Энэ мэтээр үргэлж бодлогогүй үйлдэл, болгоомжгүй зан гаргаж явдаг түүнээс намынхан нь зайгаа барьж эхэлсэн бололтой. Ер нь Ч.Ганхуяг шиг нөхдөөс болж намын нэр хүнд унаж байгаа гэж хэлэх ч хүмүүс байна. Мөн намын Их хурлын төлөөлөгчөөс хасагдсан нь МАН дотор түүний нэр хүнд унасаны жишээ гэж тус намын залуу гишүүд хэлж байгаа юм.

Намын Их хурлын төлөөлөгчөөс хассагдсандаа шаралхсан Ч.Ганхуяг намын удирдлагууд руугаа дайрсан мэдэгдлийг хийсэн байна.

Тэрбээр энэ удаагийн хурлаар намын даргаар цоо шинэ хүн томилох ёстой гэж зарлажээ. “Шинэчлэл хийж байгаа бол хийсэн шиг хийх хэрэгтэй. Үүнийг шинэ хүн гарч ирж л хийх ёстой байх. Олон жил энэ суудалд суусан хүмүүсийг дахин гаргавал нийгмийн “доог” болох биз” хэмээжээ. 

 Их хурлын сургийг сонсвол МАН-ын даргад М.Энхболд, Н.Энхболд, Ц.Нямдорж гэх хуучны “бурхиуд” нэр дэвшихээр яригдаж байна. Өөрөөр хэлбэл Ч.Ганхуягийн хүсч байгаачлан цоо шинэ хүн нэр дэвшигчдийн дунд алга. Хэдийгээр “Шинэчилье” хөдөлгөөнийхөн намын даргаа сольж, хариуцлага тооцох хэрэгтэй гэж байгаа ч тэр гээд нэр дэвшүүлчих залуу улс төрч байхгүй бололтой дог.  Гэтэл удахгүй болох 27-р Их хурлаас гишүүд нь их зүйл хүлээгээд байдаг.  Өөр хэд хэдэн гишүүнийг ч бас 27-р Их хуралд оролцох эрхийг нь хассан гэх. Ямартаа ч хоёр долоо хоногийн дараа болох энэ хурлаар хуучин хүнээ сонговол “Шинэчлэгдэж чаддаггүй, цусаа сэлбэдэггүй нам” гэсэн нэрнээсээ салж чадалгүй, залуучуудынх нь бухимдал улам нэмэгдэх бололтой. 

24tsag.mn