Дорнод аймаг өнөөг хүртэл засаг даргагүй байна. Шинэ засаг даргаа албан ёсоор томилоогүй хуучинтайгаа зууралдан хэрүүл тэмцэл хийж, шүүх цагдаагаар явж байгаа тус аймагт засаглалын хямрал нүүрлэжээ.

  Удирдлага байхгүйн улмаас болж тус аймагт засаглалын хямрал, томилгооны хүлээлт үүссэнээс гадна бүтээн байгуулалтын ажлууд замхраад байгаа гэнэ. Тухайлбал өвлийн хүйтэн болж байхад замаа ч засч дуусаагүй байгаа Дорнодод сум орон нутгийн хөрөнгө оруулалт орж ирээгүй хүлээгдэж байгаа талаар эх сурвалж  мэдээллээ.

  Мөн малын гоц халдварт шүлхий өвчин гарч Халх гол суманд хөл хорио тогтоож, нэлээд хэдэн суманд гал түймэр гарсан гэх мэтээр аймгийн удирдлагын шийдвэрийг хүлээсэн асуудал ар араасаа хөвөрч байна.

  Тус аймгийн Засаг дарга болох хүнийг Ерөнхий сайд Н.Алтанхуяг хүлээн зөвшөөрөхгүй байгаагийн улмаас нөхцөл байдал ийм хэмжээнд хүртлээ доройтоод байна гэж ярих ч хүмүүс байна. Тодруулбал Тус аймгийн ИТХ-д МАН олонхи болж аймгийн Засаг даргаар М.Бадамсүрэнг томилох хүсэлтээ хэд хэдэн удаа Ерөнхий сайд Н.Алтанхуягт өргөн мэдүүлжээ. Гэсэн хэдий ч “Төрийн албанд гурван жил ажиллаагүй” гэх шалтгаанаар түүнийг Ерөнхий сайд батламжлаагүй юм байна.

   Хэл ам, хэрүүл тэмцэл болсны эцэст Ерөнхий сайд хуучин Засаг дарга Ц.Жанлавыг эргүүлэн томилсон байна. Энэ ч цаанаа их учиртай гэнэ.

  Ц.Жанлав нь өнгөрсөн найман жилд тус аймгийг МАН-ыг төлөөлж удирдаж байжээ. Гэтэл одоо түүний бие муудаж, гадаадад эмчлүүлэх шаардлага гарсан байна. Ийм хүнд үед нь намын нөхөд нь туслах нь битгий хэл нүүр бууруулж гадуурхсан тул АН-ынханд түүний ганцаардлыг овжиноор ашиглах нэг гарц харагдсан байна. Түүнийг гадаадад хагалгаанд орох, эмчилгээ хийлгэх зардлыг зохицуулах маягаар өөрсдөдөө тал засаж,  намдаа урвуулах гэж байгаа талаар эх сурвалж мэдээлэв. Энэ мэт  түр зуур Ц.Жанлаваар Засаг даргын суудлыг мануулж байгаад өөрсдөдөө урвуулж магадгүй гэсэн хардлага Дорнодчуудад байгаа гэнэ. Сонгуулийн үр дүнгээр олонх болсон ч АН-д Засаг даргын суудлаа алдах дээрээ тулаад буй МАН-ынхан энэ маргаанаа шүүхээр шийдвэрлүүлэхээр заргалдаж гурван шатны шүүхээр ороод байна. Гэсэн ч одоогоор үр дүн гараагүй байна.
 
  Тэгвэл өнөөдөр нөхцөл байдал өөр болжээ. Тодруубал орон нутгийн сонгуулийн үр дүнгээр Дорнодод МАН 18 суудал, АН 15 суудал авсан. Гэтэл одоо гурван бие даагч АН-д нэмэгдэж орсноос болж хоёр намын суудлыг харьцаа нэмэгдэж мэдэх нь. Учир нь Ц.Жанлав дарга тэргүүтй гурван бие даагч АН-д хүчээ өгөхөөр болсон байна.

Ингээд Дорнодод АН, МАН-ын тэмцэл хурцадаж мэдэхээр боллоо. Нэг хэсэг тус аймгийн ИТХ-ын төлөөлөгч нар бөөнөөрөө бултаараа “Хаанброй"-гийн гэдэг тодотголоор нь хүмүүс илүү мэддэг С.Отгонбаатарыг дэмжиж Засаг дарга болгоно гэж байсан энэ асуудал хоёр намын сүрд дарагдаж байх шиг байна.

Харин төрийн албаны хурган дарга нар хэнийг ирж, Засаг дарга болох бол гэсэн хүлээлттэй байна. Үүний зэрэгцээ АН-ынхан дотроо хагарч өөр өөрийн хүнээс Засаг даргаар зүтгүүлэхээр ажиллаж эхэлсэн байна.  Хамгийн чухал нь намуудын тэмцэлээс болж тус аймагт хийгдэх ажлууд хийгдэлгүй овоосоор байгаа бөгөөд ард иргэд хохирч байгаа гэж нутгийнхан ярьж байна.