УИХ-ын гишүүн Ж.Батзандан татвараас нуугдахын тулд  оффшор бүсэд данс нээсэн 10 гаруй гишүүн манай УИХ-д бий гэдгийг мэдэгдсэн. Тиймээс ийм данстай гишүүдийн хөрөнгө, мөнгийг ил болгохоор “Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хууль”-д нэмэлт, өөрчлөлт оруулах хуулийн төсөл санаачилаад байна. Өөрөөр хэлбэл их хэмжээний мөнгөө татвараас нуудаг этгээдүүд түүнтэй мөр зэрэгцэн сууж байгааг Ж.Батзандан гишүүн нэрлэж чадахаар байгаа аж. Иймд түүнийг татвараас нуугдаж, оффшор бүсэд данс нээлгэсэн гэх гишүүдийн нэрийг олонд зарлахыг шаардаж эхэллээ. УИХ-ын гишүүд угаасаа бүх орлогоо АТГ-т мэдэгдэж, хөрөнгө орлогоо мэдэгдэх ёстой. Гэтэл хөрөнгийн мэдээллийг нууцалж, татварын хөнгөлт үзүүлдэг оффшор бүсэд манай 10 орчим гишүүн данстай байна гэдэг тун ноцтой асуудал юм. Хэрэв тэд илэрвэл хөрөнгө орлогоо нуусан хэргээр суудлаасаа буухыг ч үгүйсгэхгүй. Манай нэг гишүүн ийм данстай гэдэг нь батлагдсанаар УИХ-ын дэд даргын суудлаа өгсөн. Ийм ноцтой мэдээлэл хадгалж байгаа хэрнээ нуусаар байгаа Ж.Батзандан гишүүнээс олон нийт, сонгогчид оффшор бүсэд данстай гишүүдийг нэрийг зарлаж, шударга гишүүн гэдгээ батлахыг хүсч байна.

    Оффшор данстай байна гэдэг цаана ямар нэгэн “но”-тойг илэрхийлж байгаа хэрэг. Хууль бусаар олсон мөнгө, ямар нэгэн хээл хахуулийн аргаар орж ирсэн орлогоо ийнхүү нуун дарагдуулах магадлал өндөр байдаг. Түүний хэлснээр үнэхээр манай парламентад ийм 10 хүн байгаа гэвэл үнэхээр ноцтой хэрэг. Үгүй бол Ж.Батзандан гишүүн худал чалчигч болж таарах нь.

   Ер нь дэлхийн улс орнууд санхүүгийн аюулгүй байдлаа хангахын тулд төрийн өндөр албан тушаалтнуудаа оффшор бүсэд мөнгө байршуулах, гадаадад үл хөдлөх хөрөнгө худалдаж авах чиглэлийн үйл ажиллагаанд хязгаарлалт хийж байгаа. Саяхан Германы хоёр том албан тушаалтан оффшор бүсэд мөнгө байршуулсныхаа төлөө үүрэгт ажлаасаа огцорсон. Тиймээс ч манайх энэ асуудалд анхаарах цаг аль хэдийн болжээ. Ж.Батзандангийн санаачлаад буй хуулийн төсөлд төрийн өндөр албан тушаалтан болон түүний гэр бүлийн нийт 2000 хүн хамрагдахаар байгаа аж. Төрийн, улс төрийн, захиргааны, болон тусгай албаны удирдах албан тушаалтан албан тушаалаа гүйцэтгэх хугацаандаа болон уг албан тушаалаасаа чөлөөлөгдсөн цагаасаа хойш хоёр жилийн хугацаанд өөрийн болон эхнэр нөхөр, нэг өрхийн бүртгэл дээр хамтран амьдардаг насанд хүрээгүй хүүхэд оффшор бүсэд данс эзэмшихийг хориглоно гэсэн заалт орж байгаа. Мөн Төрийн болон орон нутгийн өмчит, Төрийн болон орон нутгийн өмчийн оролцоотой компанийн  захирал, ТУЗ-ийн гишүүд гадаадад оффшор данс эзэмшиж болохгүйг тусгасан байна.  
    Манайхан батлах дургүй хуулиа гацаасаар хэдэн намар, хаврыг үддэг. Энэ хуулийн төслийг хэлэлцэх, батлах гэсээр байтал нөгөө 10 гишүүний ээлжээ өгөх цаг тулах вий дээ. Тиймээс ямааны мах халуун дээрээ гэдэг шиг Ж.Батзандан гишүүн шударга гишүүн гэдгээ харуулж тэр 10 гишүүнийг нэрлэх хэрэгтэй байна.