Сан Франциско дахь Ерөнхий консул Н.Анхбаяр, дэд консул Б.Болд нар консулын тойргийн Колорадо мужид энэ сарын 5-9-нд ажиллалаа. Энэ үеэр Денвер хотын Захирагч Майкл Ханкоктой уулзаж Улаанбаатар, Денвер хотуудын хамтын ажиллагааны өнөөгийн түвшин, цаашид хамтран ажиллах боломж, бололцооны ярилцав.Ерөнхий консул Н.Анхбаяр хоёр хотын эгч дүү хотын харилцааны шугамаар олон ажил амжилттай хэрэгжиж буйг онлоод Захирагч Майкл Ханкокыг Э.Бат-Үүл даргын урилгаар Улаанбаатар хотод хийх айлчлалаа 2014 онд хэрэгжүүлэх хүсэлт тавьж, айлчлалын бүрэлдэхүүндээ ХАА, уул уурхай, хот тохижилтын компаниуд, хөрөнгө оруулагчид болон их сургуулиудын төлөөлөл оролцуулахыг санал болгов. Захирагч Майкл Ханкок Улаанбаатар хотод 2014 онд айлчлах чиглэлээр ажиллахаа мэдэгдэв.
Колорадо мужийн Эдийн засгийн хөгжил, олон улсын худалдааны газрын удирдлагуудтай уулзаж Монгол Улс, Колорадо мужийн хооронд хөдөө аж ахуйн, тэр дундаа мах, сүү, сүүн бүтээгдэхүүн боловсруулах үйлдвэрлэлийн салбарт хамтран ажиллах, Монгол Улсын Шинжлэх ухаан, техникийн их сургууль, Колорадогийн Уул уурхайн сургууль хооронд шууд хамтын ажиллагааны тогтолцоо бүрдүүлэн оюутан солилцох, аялал жуулчлалын харилцааг хөгжүүлэх үүднээс хоёр талын салбарын холбоод хооронд шууд хамтын ажиллагаа бий болгох санал тавьж, хэрэгжүүлэх чиглэлээр ажиллахаар тохиролцов.
Мөн Эрдэм, Колорадо мужийн Монгол сургуулиудын үйл ажиллагаатай танилцаж, монгол хэлний I-V ангийн сурах бичиг, “Би монгол хүн” DVD зэрэг 70 гаруй ном, сурах бичиг, сургалтын материалыг хүлээлгэн өгч үйл ажиллагаанд нь багахан боловч бодитой дэмжлэг үзүүлэв. Денвер хотын монгол иргэдийн санаачилга, зүтгэлээр байгуулагдсан Улаанбаатар парк, Тулга хөшөөг үзэж сонирхон, Колорадо мужийн Монголчуудын холбооны төлөөлөлтэй уулзав.
Эдгээр албаны уулзалт, ажлаас гадна Ням гаригт иргэдэд төрсний, гэрлэлтийн зэрэг иргэний бүртгэлийн, нотариатын, гадаад паспорт шинээр авах мэдүүлэг авах, хүчинтэй хугацааг сунгах болон иргэний шинэчилсэн бүртгэлд хамруулах зэрэг консулын үйлчилгээ үзүүлж, Колорадо мужийн хорих ангиудад ял эдэлж буй хоёр иргэнээ эргэв.
