Улс төрч, бизнесменүүдийн холбоо хэлхээ улс орныг туйлдуулж байна. Ирэх жилийн төсвийн анхны хэлэлцүүлэгийг хийх үед Засгийн газрын тэргүүн учирлав. Энэ тухай Н.Алтанхуяг “Анх 800 сая гэсэн байшин явсаар байгаад найман тэрбум төгрөг болдог. Жишээ нь Сэлэнгэд 800 сая гэсэн усан бассейн одоо 4.5 тэрбум төгрөгийн өртөгтэй боллоо. Ингэж өгөхгүй бол босохгүй гэнэ. Завханы хөгжим бүжгийн театр гурван тэрбумаар эхлээд одоо 10 тэрбум болж байна. Гачуурт тосгонд аврах гал унтраах ангийн барилга 916 сая төгрөгөөр анх эхэлсэн. Одоо 2.8 тэрбум төгрөг болсон. Яармагт байгаа 300 ортой төрөх эмнэлэг байна. Раам нь 17 тэрбумаар босчихсон. Одоо 32 тэрбум болго гэдэг” хэмээн тайлбарласан.

    Эдгээр нь улсын төсөвт мөнгө суулгачихаад ажлыг нь эхлүүлчихээд дараа жил мөнгийг нь нэмээд хэсэг хүмүүсийг ажилтай болгоод улсыг шулдаг болсон сонгодог жишээнүүд. Жил ирэх бүр төсвийг нь нэмэгдүүлнэ. Шалтгаан нь юмны үнэ өссөн, өнгөрсөн жилийнхээс өөр болсон гэдэг. Шаардлагатай мөнгийг өгөхгүй бол ашиглалтад өгөхгүй гэж улсыг шууд дарамталдаг. Энэ бол сүүлийн жилүүдэд бий болсон рекетийн шинжтэй ажиллагаа.

    Ийм ажиллагааг нэг аж ахуйн нэгжийн эзэн дангаараа хийж чадахгүй л дээ. Тэдний цаана тендерийг зохицуулж өгсөн,  эсвэл төсөвт мөнгийг нь суулгаж өгөх гээд данхайгаад сууж байгаа эрхэм гишүүд бий.

    Өөрөөр хэлбэл гишүүд нь төсөвт мөнгө суулгаж ажил эхлүүлчихээд хэдэн жил дамнуулан ажлаа үргэлжлүүлж төсвөөс мөнгө цохиж байна. Жил бүр гишүүд нь түүн дээрээ ажиллаад л. Цаашид хөрөнгө оруулалтын байдал иймэрхүү дампуу байдлаар үргэлжилвэл ард түмний татварын мөнгө үргүй урссаар байна. Тиймээс иймэрхүү байдлаар босдоггүй барилгуудыг хуулийн байгууллагынхан шалгаад эхнээс нь хариуцлага тооцоод явахгүй бол байдал улам л хүндэрнэ.

    Арга ядсан Засгийн тэргүүн сүүлдээ “Заримыг нь хувьд өгдөг юм уу. Хувийн хэвшил аваад бариг. Ер нь төрийн байгууллага шинээр байшин барьдаг байдлаа болчихвол яасан юм” хэмээн учирлаж байна. Төрийг хэтэрхий их шулаад байхаад ингэхээс ч өөр яахав дээ.

    Ер нь улсын хэмжээнд дуусдаггүй, он дамжин их мөнгө нэхдэг барилга болоод гүйцэтгэгч аж ахуйн нэгжүүдийн нэрийг нэгдсэн байдлаар олон нийтэд зарлах хэрэгтэй байна. Ядаж л хаана юу болоод байгааг ард түмэн мэдэж байх нь зөв шүү дээ.

    Ингэхгүй бол ард түмний татварын мөнгийг хөдөө барилга барьж байгаа нэрээр тэрбум тэрбумаар нь үрэн таран хийх болсныг дээрх жишээнүүд нотолно.