МАН-ынхан Тусгаар тогтнолын ордонтой болсны дараа Ардчилсан намын гишүүд мөн 20 давхар "Ардчиллын Өргөө" нэртэй шинэ ордонтой болохоор хандив цуглуулж эхэлсэн. Хамгийн сүүлийн мэдээллээр иргэд, байгууллагаас 80 сая төгрөг цугларсан гэдэг. Гэтэл өнөөдөр барилгын ажил нь гацаанд орж, жирийн гишүүд  нь ч шинэ байрны тухай асуухаа больж, мартагдах тийшээ хандаж эхэлжээ. Одоо бүр ДБЭТ-ын хажууд байрладаг шилэн барилгын газраа алдаж, шинэ ордон баригдах хөг нь өнгөрч байх шиг.

   Учир нь энэ байрыг барихад 20 тэрбум гаруй төгрөг хэрэгтэй гэж төсөл зургийг нь гаргажээ. Намын гишүүдээс нь хандивын шугамаар дөнгөж нэг тэрбум хүрэхгүй хөрөнгө цугларчихаад байдаг. Тиймээс шилэн байрныхаа газрыг буюу шинэ байрныхаа газрыг Худалдаа хөгжлийн банкинд барьцаалан зээл авчээ. Тэд банкнаас эхлээд зургаан тэрбум төгрөг зээлээд дараа нь хөрөнгө оруулалтаа нэмэх зорилгоор гурван тэрбумыг авчээ. Ингээд Худалдаа хөгжлийн банкинд нийт 9 тэрбум төгрөгийн оронд газраа барьцаалсан байна. Гэтэл өнөөдөр байдал бишдэж нөгөө зээлсэн 9 тэрбумаа эргүүлэн төлж чадахгүй, газраа банкинд хураалгахдаа тулаад байгааг баттай эх сурвалж хэллээ. Учир нь энэ есөн тэрбум төгрөгийг сонгуулийн ажилд зарцуулж дуусгажээ. Энэ мөнгийг нэгэнт намын ажилд зарцуулж, эрх баригч нам болж чадсан тул ихэнхи гишүүд нь харамсахгүй, хэл ам гаргах шаардлагагүй гэж үзэж байгаа аж. Гэхдээ л сөрөг хүчин нь тансаг байранд байхад өөрсдөө хуучны барилгад суугаад байгаа нь таагүй байгаа бололтой. Намын гишүүдээс нь ч нийлээд энэ өрийг төлж, газраа буцааж авъя гэж санал, санаачлага гаргах хүн олдохгүй байгаа гэнэ.

  Худалдаа хөгжлийн банк ч ДБЭТ-ын хажууд, Засгийн газрын ордны ойролцоо, хотын “А” зэрэглэлийн бүсэд багтах газрыг барьцаандаа авах маш их сонирхолтой байгаа аж. Тиймээс өрөө төлж чадахгүй болсон эрх баригч намынхан газраа өрөнд өгдөгөөрөө өгөөд, өөр шинэ байрны арга бодож эхэлсэн байна. Ямартаа ч АН-ын шинэ байранд зориулж цуглуулсан гишүүдийнх нь хандив сонгуулийн зардалд урсчээ. Мөн ойрын хэдэн жил тус намынхан өөрсдийн гэсэн шинэ байртай болно гэхэд хэцүү боллоо. Нийлээд 9 тэрбумын төгрөгөө төлж чадахгүй байхад дахин 20 тэрбумын өртөгэй “Ардчиллын Өргөө”-г барина гэдэг үлгэр мэт сонсогдож байна.