УИХ-ын гишүүн С.Ганбаатар өнөөдөр гишүүн болсноосоо хойшхи төсөвт зардал болон хөрөнгө орлогын мэдүүлгээ дэлгэрэнгүй тайлагналаа.

Тэрээр сардаа нэг сая 267 мянган төгрөгний үндсэн цалинтай бөгөөд түүн дээр нь онцгой нөхцлийн нэмэгдэл 30 хувь нэмэгдэж нэг сая 648 мянган төгрөгний цалин гар дээрээ авдаг аж.

Харин гишүүний зарцуулах боломжтой мөнгөн төсвөөс 67 сая 592 мянган төгрөгийг туслах, зөвлөхийн цалинд, 32 сая төгрөгөөс албан томилолт, унаа, мэдээлэл сурталчилгаа, зочны хүлээн авалт, ном хэвлэл, гадаад арга хэмжээний бэлэг дурсгал зэрэгт зарцуулжээ. Үүнээс арван сая төгрөгийг нь хуулийн төсөл боловсруулахад зарцуулсан байна.
Мөн өөрийн эзэмшлийн газаргүй, өвлөж авсан гурван сая 500 мянган төгрөгийн үнэ бүхий хөөрөг, 70 сая төгрөгийн үнэтэй угсармал бетонон орон сууц, 17 сая төгрөгийн үнэ бүхий 2011 оны Toyota RAV-4 автомашин, хурдан удмын гурван адуу, 50 үхэр, 30 ямаатай гэжээ.