УИХ-ын Эдийн Засгийн Байнгын хороо, Төсвийн Байнгын хорооны хамтарсан хуралдаанаар Монгол Улсын Засгийн газар, Азийн Хөгжлийн банк хооронд байгуулах “Хүнс тэжээл, нийгмийн халамжийн төсөл: нэмэлт санхүүжилт”–ийн зээлийн гэрээний төслийг зөвшилцөх тухай асуудлыг хэлэлцлээ.Дээрх төслийн хүрээнд 20 сая ам.долларын буцалтгүй тусламжийг авах бөгөөд үүнээс 16 сая долларыг тоног төхөөрөмж, мэдээлэл харилцааны салбарт зарцуулах юм. Мөн буцалтгүй тусламжийн хүрээнд ядуу, эмзэг бүлгийн өрхийн насанд хүрсэн нэг хүнд 10000 төгрөг, бага насны хүүхдэд 5000 төгрөгийн хүнсний талоныг олгох буюу үүнд нийт 320. 000 хүн хамрагдах ажээ.
Хэлэлцэж буй асуудалтай холбогдуулан УИХ-ын гишүүд ажлын хэсгээс асуулт асууж, хариулт авлаа. Тухайлбал, УИХ-ын гишүүн Л.Энх-Амгалан, “320.000 хүнд хүнсний талон өгч байгаа нь багагүй тоо гэдгийг хэлээд, энэ төсөл хөдөө орон нутагт маш их хэл ам дагуулдаг. Урьд нь ядуу өрх, ядуу иргэнийг сумын дарга, баг, хорооны дарга нар тодохойлдог байсан бол сүүлийн жилүүдэд орлого орлуулан тооцох аргаар тооцох болсон нь хүнсний талон авах шаардалагатай хүмүүстээ хүрэхгүй байна. Иймээс цаашид энэ аргачлалаараа яваад байх уу” гэдгийг тодруулсан бол УИХ-ын гишүүн Ч.Хүрэлбаатар, “Төслийн нэрнээс авч үзвэл хүнсний талон, нийгмийн халамжийн чиглэлд зарцуулагдахаар харагдаж байна. Гэвч ихэнх мөнгө нь тоног төхөөрөмжийн зардалд зарцуулагдахаар байгаа нь ямар учиртай вэ “гэдэгт хариулт авахыг хүслээ. Түүнчлэн УИХ-ын гишүүн Р.Амаржаргал, “Анх хэрэгжүүлсэн төсөл хэл ам дагуулж байгааг хэлээд төслүүд үр дүнтэй байх, ялангуяа хүмүүст хүргэх арга замыг хэрхэн сонгож байгаа” талаар тодруулсан юм. Мөн тэрээр, өнөөдөр гурван хүн тутмын нэг нь ядуурлын түвшинд байна. Энэ асуудлаа яаж шийдэх вэ, талон өгөөд байх нь оновчтой шийдэл биш байх гэсэн шүүмжлэлийг хэлэв.
Ингээд Монгол Улсын Засгийн газар, Азийн Хөгжлийн банк хооронд байгуулах “Хүнс тэжээл, нийгмийн халамжийн төсөл”-ийн санхүүжилтийн зээлийн гэрээг зөвшилцөх тухай” асуудлыг хэлэлцэхийг хуралдаанд оролцсон гишүүдийн олонхи нь дэмжлээ.
Үүний дараа Эдийн засгийн байнгын хороо Төрөөс эрдэс баялгийн салбарт баримтлах бодлого батлах тухай” Улсын Их Хурлын тогтоолын төслийн анхны хэлэлцүүлэгийг хийх байсан ч намын бүлгүүд энэ асуудлыг эцэслэн шийдээгүйгээс өнөөдрийн хуралдааныг хойшлуулахаар боллоо гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.
