"Мобиком"корпораци хэрэглэгчдээ шулж, уран бүтээлчдийн оюуны өмчийг зөвшөөрөлгүйгээр ашиглаж байгаа тухай хүн бүр л мэдэх болжээ. Энэ шударга бус үйлдэлтэй тэмцэхээр уран бүтээлчид ч эхнээсээ нэгдэж эхэлж байгаа. Тэдгээрийн нэг бол МУГЖ С.Жавхлан. 

"Мобиком" С.Жавхлангийн уран бүтээлийг зарж 300 орчим сая төгрөг олсон нь тогтоогдсон. Ингэж ашиг олж байхдаа "Монголын бүх хөгжмийн зохиолч, яруу найрагчдын эрхийг хамгаалах холбоо"-нд жилд 10 сая төгрөг өгдөг байсан аж. Ингээд С.Жавхланг тэмцэж эхлэхээр янз бүрийн хуурамч гэрээ байгуулах санал тавьж байсан гэдгийг дуучин маань хэлж байв.  Улмаар гэрээг хүлээж авахгүй байсанд "Монгол контент" гэх охин компанийхаа нэрийг барьж, тус компанируу бүх зүйлийг чихэж байгаа талаар ч  өмгөөлөгч Ц.Монгол хэлсэн юм.

МУГЖ С.Жавхлангийн хувьд тэмцлээ үргэлжлүүлсээр байх болно гэдгээ албан ёсоор мэдэгдсээр байгаа. Мөн тэрбээр ""Мобиком"-ыг гадаадын хөрөнгө оруулалттай компани гэж сонссон. Гадаад хүн яаж Монголчуудыг хайрлахав, ашиглаад хаяхаа л бодно. Ийм компаниуд ядуу буурай оронд шургалж орж ирчихээд бүх ард түмнийг шулж хөл дээр нь сөхрүүлдэг. Олон нийт мэдээд ирэхээр хуурамч дампуурлаа зарлаж хэдэн антеннуудаа хаяад гараад явчихдаг юм гэсэн" гэж эсэргүүцлээ илэрхийлжээ.