“Усны сав газар, ойн сан бүхий газар ашигт малтмал эрэх, хайх ашиглахыг хориглох тухай” хуулийг хэрэгжүүлэхтэй холбоотой асуудлаар "Гал үндэстэн" холбоо болон байгаль орчны төлөө үйл ажиллагаа явуулдаг иргэний нийгмийн байгууллага, иргэдийн уулзалт өчигдөр болсон.

Уулзалтаар хэлэлцсэн асуудлуудыг нэгтгэж, өнөөдөр Үндсэн хуулийн цэцэд хандахаар болжээ.

Учир нь “Усны сав газар, ойн сан бүхий газар ашигт малтмал эрэх, хайх ашиглахыг хориглох тухай” хуулийг дагаж мөрдөхийг дээд шүүхээс Засгийн газарт хэд хэдэн удаа даалгасан ч огт хэрэгжүүлж ирээгүй байна. Тиймээс Засгийн газрыг “Улсын дээд шүүхийн шийдвэр шүүхийн эцсийн шийдвэр байх бөгөөд түүнийг бүх шүүх, бусад этгээд заавал биелүүлнэ...” гэсэн заалтыг зөрчсөн гэж үзэж Үндсэн хуулийн цэцэд хандах гэж байгаа аж. Мөн Засгийн газрыг урт нэртэй хуульд дураараар өөрчлөлт оруулж, байгаль орчныг сүйтгэх гэж байна хэмээн "Гал үндэстэн" холбоо болон байгаль орчны төлөө үйл ажиллагаа явуулдаг иргэний нийгмийн байгууллагууд үзэж байгаа юм байна.