Чуулганаар 2013 оны улсын төсвийн тодотголыг хэлэлцэж байна. 2013 оны төсвийн орлого нэг их наяд төгрөгөөр тасалдсанд УИХ-ын гишүүд бухимдан шүүмжилж байна. УИХ дахь МАН-ын бүлгийн гишүүд төсөвт тодотгол хийх болсон нь Засгийн газрын үйл ажиллагаатай холбоотой хэмээн үзэж байгаа бол УИХ-ын гишүүн Р.Амаржаргал үүнд “УИХ өөрөө буруутай, үүний төлөө хариуцлага хэн хүлээх вэ” гэсэн асуудал тавив. Тэрбээр энэ талаар "2013 оны төсвийг анх Сангийн яам оруулж ирэхдээ нилээн танасан. Харин УИХ 1.4 их наядаар хөөсрүүлсэн. Ингэж хөөсрүүлсэн хариуцлагыг хэн хүлээх вэ?. Юу л байна мөнгө байна, хөдөө орон нутаг яваад ир, хийх ажлын жагсаалтаа гаргаад ир гээд  ярьж байсан сайд өнөөдөр хариуцлага хүлээх үү. Оюутолгойгоос 450 миллард төгрөг заавал оруулж ирнэ. Оруулж ирэхгүй бол албан тушаалаасаа огцроно гэж хэлж байсан Ерөнхий сайд хариуцлага хүлээх юм уу. Өргөн барьсан төслийг 20 хувиар өсгөхөд юу ч дуугарахгүй байсан Сангийн сайд, Ерөнхий сайд ямар хариуцлага хүлээх вэ. Ийм хөөсрүүлсэн төсвийг УИХ-д өргөн барьж батлуулсан олонхийн бүлэг ямар хариуцлага хүлээх вэ? Сөрөг хүчнийхээ амыг барьж байгаад төсвийг баталчихсан УИХ-ын дарга хариуцлага хүлээх үү?" гэж  асуулаа. Тэрбээр үргэлжлүүлэн ярихдаа би 2013 оны төсөвт эсрэг санал өгч байсан. Гэсэн ч өнөөдөр УИХ-ын гишүүнээсээ татгалзахад бэлэн байна. Монголын эдийн засгаар тоглочихоод юу ч болоогүй юм шиг царайлаад сууж болохгүй гэв

Р.Амаржаргал гишүүний дараа Д.Оюунхорол, Н.Энхболд, Эрдэнэбат гишүүд Ерөнхий сайдаас асуулт асуулаа. Энэ талаарх мэдээллийг удахгүй хүргэх болно.

Одоо УИХ-ын чуулган үргэлжилж, төсвийн тодотголыг хэлэлцэн гишүүдийн асуулт Ерөнхий сайдын хариултаар үргэлжилж байна.