МАН-ын ээлжит Их хурал энэ сарын 27-ны өдөр эхэлнэ. Тэгвэл тус намынхан Их хурал орох төлөөлөгчдөө сонгосон байна. Хуралд тус намын нийт 200 гаруй мянган гишүүдээс сонгогдсон 1134 төлөөлөгч оролцож, намын тулгамдсан асуудлаа хэлэлцэх юм. Их хуралд оролцох төлөөлөгчдөө нээлттэй сонгуулиар сонгосон аж. Энэ удаа намын дүрмийн өөрчлөлт, бүтцийн өөрчлөлт, намын даргаа солихоос эхлээд чамгүй олон асуудал хэлэлцэнэ.  Хурал ч нэлээд хэд хоног  үргэлжлэх нь тодорхой. МАН хэмээх томоохон институцийн хувьд дарга,  удирдлага нь хэн байх, намын ерөнхий нарийн бичгийн дарга хэн болох, Удирдах зөвлөлийн гишүүд хэн байх нь анхаарал татаж байгаа зүйлүүдийн нэг. Мөн намын шинэ даргаар М.Энхболд, Н.Энхболд, Ц.Нямдорж, нарын нэгийг сонгогдож магадгүй гэсэн хувилбаруудыг ч хэвлэлээр аль хэдийн бичээд эхэлсэн байна. Хоёрдугаарт Их хурлаараа Монголын улсын хөгжлийн бодлого, хууль шүүх, хяналтын байгууллагуудын асуудлыг ярилцана гэж байгаа юм. Мөн ядуурлыг хэрхэн бууруулах, ард иргэдийн амьдралыг хэрхэн дээшлүүлэх, хэрхэн айл бүрийг байр орон сууцтай болгох, нийгмийн даатгал, тэтгэвэр тэтгэмжийн асуудлыг хэрхэн боловсронгүй болгох вэ, Эрүүл мэндийн үйлчилгээг яаж ялгаваргүй үзүүлэх  гэх мэт үндсэн таван чиглэлээр хөгжлийн хөтөлбөр боловсруулж нийт гишүүд дэмжигчдээрээ хэлэлцүүлсэн байна. Улс орноо хөгжүүлэхийн тулд намаа хэрхэн шинэчлэх вэ гэдэг асуудлын хүрээнд “Урагшаа 21” гэсэн хөтөлбөрийг боловсруулсан бөгөөд энэ бүхнээ 27-ны өдрийг хүртэл нийт гишүүд, эрдэмтэн судлаачдаар хэлэлцүүлж байгаа аж.