Чуулганы үдээс хойшхи хуралдаан хуралдаанаар 2013 оны улсын төсвийн тодотголыг хэлэлцлээ. 2013 оны төсвийн орлого нэг их наяд төгрөгөөр тасалдсанд УИХ-ын гишүүд бухимдан шүүмжилж байгаа.Асуудлын хүрээнд УИХ-ын гишүүн С.Дэмбэрэл хувийн хэвшлийн хөрөнгө оруулалтаар хийгдсэн ажил энэ онд ямар байсанд сайд нарыг хариулт өгөхийг хүслээ.
Эрчим хүчний сайд М.Сономпилийн хэлж буйгаар энэ онд Тавдугаар цахилгаан станцын сонгон шалгаруулалт хийгдсэн. Үүнийг дагаж 1.5 тэрбум ам.долларын хувийн хөрөнгө оруулалт тус салбарт орж ирэх боломжтой болсон. Тавантолгойн нүүрсний ордыг түшиглэн цахилгаан станц баригдана. Хөрөнгө оруулалт 900 тэрбум ам.доллараас 1 тэрбум төгрөгийн хооронд яригдаж байгаа гэнэ.
Харин Зам тээврийн сайд А.Гансүхийн онцолсноор уул уурхайн компаниуд эрдэс баялгаа тээвэрлэхийн тулд авто замд хөрөнгө оруулалт хийж буй аж. Тухайлбал, “Петро чайна”, “Алтайн хүдэр” зэрэг хэд, хэдэн компаниуд 400 орчим км авто зам тавьсан. Хөрөнгө оруулалтыг хараахан тооцоогүй байгаа гэлээ.
Эдийн засгийн хөгжлийн дэд сайд О.Чулуунбатын тайлбараар бол гадаадын шууд хөрөнгө оруулалт одоогоор 1.7-1.8 тэрбум ам.доллар байгаа, өнгөрсөн жил өдийд 4.4 тэрбум ам.доллар байсан. Тиймээс ирэх жилд гадаадын шууд хөрөнгө оруулалтыг 2 тэрбум ам.доллараар төсөөлж төсөвт суулгасан. Ингэхгүй бол хөрөнгийн бирж дээр хувьцааны ханш сайнгүй байгаа. Хувьцааны ханш өсөөд ирвэл хөрөнгө оруулалтад сайнаар нөлөөлнө гэсэн юм.
Хэлэлцүүлэгтэй холбоотойгоор Д.Оюунхорол гишүүн “Бид бүхэн болохгүй зүйлээ яриад л байвал яриад л байна. Тиймээс Н.Алтанхуяг дарга аа. Бид олонхи байхдаа олонхиороо түрээд шийдсэн алдаанууд байгаа. Үүнийг битгий давтаасай гэж хүсч байна. Та өнөөдөр яг ажлаа хийж чадахгүй байгаа сайдуудаа шууд нэр цохож байгаад огцруулах хэрэгтэй. Хууль бус тендер зарлаад ажлаа хийдэггүй сайд нар байгаа гээд л яриад байхын оронд шууд тэднийг нэрийг нь дуудаж байгаад огцруул. Ард түмэн үүнийг л хүлээж байгаа шүү” хэмээв. Мөн УИХ-ын гишүүн О.Баасанхүү “УИХ-ын Төрийн байгуулалтын байнгын хорооны даргыг огцруулах ёстой” гэх санал гаргасан бол УИХ-ын Эдийн засгийн байнгын хорооны дарга Б.Гарамгайбаатар байнгын хорооны даргын албаа өгсөн ч болж байна” гэв.
Түүнчлэн УИХ-ын Байгаль орчин, хүнс хөдөө аж ахуйн байнгын хорооны дарга Г.Баярсайхан “Засгийн газар хариуцлагагүй ажилласан. Наадмын дараанаас эхлээд сайдууд хөдөө гадаагүй тэнэж баярласан. Түүний гор одоо гарч байна. Тэр тусмаа Ерөнхий сайдад хандаж хэлэхэд нүүрс ярьдагаа болих хэрэгтэй. Нүүрс чинь хорооны хэсгийн дарга хийдэг ажил. Би ч байнгын хорооны даргаасаа огцорход бэлэн байна” гэж хэллээ.
Чуулганы хуралдааны үеэр Ерөнхий сайдын тойрсон шүүмжлэл байсангүй.
Тухайлбал УИХ-ын гишүүн Д.Хаянхярваа "Ерөнхий сайд хэрэгжээгүй гэдэг асуудлуудыг шоу болгоод, өөрөө илрүүлчихсэн мэтээр ярьж байгаа нь утгагүй. Хөрөнгө оруулалт, бүтээн байгуулалтын чиглэлээр хийж буй ажлуудад алдаа дутагдал байгааг олон жил ярьж байна. Түүнээс гэнэт өнөөдөр л гараад ирсэн асуудал биш. Засгийн газар ажлаа хангалтгүй хийсэн гэдгээ хүлээн зөвшөөрөх хэрэгтэй" гэсэн бол УИХ-ын гишүүн Я.Содбаатар "Хариуцлагын тогтолцоог хаа хаанаа ярих ёстой. Төсвийн сахилга баттай байх хэрэгтэй. Ер нь парламентийн зааланд үнэн яримаар байна. Барилга байгууламж, зам гүүр барих ажил удааширдаг нь олон шалтгаантай. Төсвийг нь батлахдаа 2-3 жилээр сунгаад тавьчихдаг. Тэгэхээр дараа дараагийн жилд өртөг нэмэгдэх нь ойлгомжтой. Ерөнхий сайд энэ ажлыг толгойгоороо хариуцах ёстой. Хариуцсан ажлаа олигтойхон шиг хийх ёстой" гэсэн юм.
