Ерөнхий сайд Н.Алтанхуяг үе үе буруу, зөрүү ярьж олны анхааралд орж байдаг ч УИХ-ын чуулган дээр 2013 оны төсвийг авлигажсан төсөв байсан гэж зарласан нь бусад гишүүдийн уур бухимдлыг өрдөж орхилоо. Энэ төсөв бол Н.Алтанхуягийн толгойлсон Шинэчлэлийн Засгийн газрын баталсан анхны төсөв. Ерөнхийлөн захирагч нь Н.Алтанхуяг өөрөө байсан. Гэтэл өөрийнхөө болон Засгийн газрынхаа ажлыг “авлигажсан” гэж нэрлэсэн нь араасаа олон асуудал дагуулж эхэллээ.

  Хэрэв Н.Алтанхуяг өнгөрсөн төсвийг авлигажсан гэдгийг баттай мэдэж байгаа бол яагаад авлигыг тэр дор нь зогсоогоогүй вэ гэдгийг АН-ын сонгогчид гайхаж байна. Сургууль цэцэрлэг, зам тавих гээд тендерүүдэд “но” явж байдгийг хүмүүс мэдэж, сонссоор ирсэн. Энэ явдал Н.Алтанхуягийн үед ч зогсоогүй, үргэлжилсээр байгаа. Ерөнхий сайд ч үүнийг нарийн сайн мэддэг нь “4 тэрбумын байшинг 5 тэрбумаар үнэлүүлээд тэр төсөвчин захиалагч хоёр нь хуваагаад авчихдаг” гэснээс нь харагдаад байх шиг. Тэгсэн хэрнээ он дуусч байхад гэнэт нээлт хийсэн юм шиг чуулган дээр зарлах нь нүдээ олсонгүй.

   Ер нь 2013 оны төсөв үр дүн муутай, зориулагдах ёстой салбартаа мөнгө нь очиж чадаагүй гэдэгтэй Ерөнхий сайдаас эхлүүлээд бүгд санал нийлж байх шиг. Ажил нь дуусаагүй барилга дараа жил нь төсөв нь хэд дахин нэмэгдээд ороод ирдэг талаар хангалттай ярилаа. Тэгвэл энэ дампуу төсвийн хариуцлагыг хэн хүлээх вэ?  Мэдээж ерөнхийлөн захирагч Ерөнхий сайд, яамны сайд нарынхаа хамт хүлээх ёстой баймаар. Н.Энхболд гишүүн “Авлигажсан төсөв том асуудал боллоо. Ерөнхий сайд оруулж ирсэн төсвөө авлигажсан гэж ярихаар хүнд байдалд орж байна. Ерөнхий сайдын хэлснээр бол маргааш УИХ-ын чуулганд баахан тендерт ялсан компанийн нэр оруулж ирэх юм байна, Мөн Төрийн нарийнаас доошоо бүх албан тушаалтнууд УИХ-ын чуулганд оролцох нь. Үндсэндээ тэд бүгд авлигачид юм байна” гэв. Энэ мэтээр Н.Алтанхуягийн нэрлэснээр Шинэчлэлийн Засгийн газрынхан бүгд авлигачид болоод “хувирчихлаа”.

   Мөн Н.Алтанхуяг сайд энэ үгээрээ УИХ-ын танхимд сууж байгаа гишүүдээ бусдад тендер авч өгөөд ашиг хүртдэг “авлигачид” гэж эмзэглүүлээд авлаа. Ялангуяа МАН-ын гишүүд энэ үгэнд ихэд бухимдаж, өөрсдөө олонхи гэж баталчихаад биднийг бас “хутгалаа” гэцгээж байна. УИХ-ын гишүүн Ч.Хүрэлбаатар “Ерөнхий сайд төсвөө авлигажсан гэж үзэж бгаа бол хэлэлцүүлгээ зогсоогоод шалгуулж байгаад хэлэлцье. Тэгэхгvй бол бид хэрэгт орох нь” гэсэн бол бусад МАН-ын гишүүд Ерөнхий сайд нь өөрөө ингэж нэрлэж байгаа бол 2013 оны төсвийг хэн, хэрхэн зарцуулсныг АТГ-аар шалгуулах ёстой” гэсэн байр суурийг илэрхийллээ. А.Тлейхан гишүүн “Ажлын хэсэг гаргаж 2013 оны төсвийн зардлыг хянах ёстой. Ажлаа хийгээгүй сайдад хариуцлага ногдуулах тухай асуудлыг Ерөнхий сайд УИХ-д оруулж ирэх ёстой” гэв. Ямартаа ч 2013 оны төсөв тун муу батлагдсан гэж ЗГ, УИХ дүгнэж байна. Өөрийнхөө баталсан бас авлигажсан гэж нэрлэсэн төсвөө Н.Алтанхуяг сайд үнэхээр АТГ-д шалгуулж чадах болов уу?