УИХ-ын чуулганы үдээс өмнөх хуралдаан үргэлжилж байна. Чуулганаар төсвийн орлого нэг их наяд төгрөгөөр тасалдсанд УИХ-ын гишүүд бухимдан шүүмжилж байна.

УИХ-ын гишүүн Н.Энхболд “УИХ-аар төсвийн тодотголыг хэлэлцэж байгаа үйл явц нь Засгийн газрын үйл ажиллагааг ном журмын дагуу явуулж чадахгүй байгааг харуулж байна. Цөөнхийн бүлгийн хувьд хамтраад зөвшилцөөд алдаа мадагтай зүйлийг засъя гэж үзсэн ч биднийг байтугай олонхийн гишүүнээ тоодоггүй юм байна.  Ерөнхий сайд оруулж ирсэн төсвөө “Мэдэхгүй ээ” гэж байна, сайд нартайгаа санал зөрж байгаа гэсэн. Ийм Засгийн газар байж болдоггүй юм, ийм хариуцлагагүй байж болохгүй. Мөн Ерөнхий сайд “Энэ Засгийн газрыг зангиддаг хүн нь би биш ээ, зохицуулдаг хүн” гэв.  Зохицуулагчийн ажил бол Замын цагдаагийн ажил болохоос Ерөнхий сайдын хийдэг ажил биш. Ерөнхий сайд та бол танхимынхаа сайдуудыг бүгдийг зангидах ёстой болохоос биш ирсэн машинуудыг нааш цааш нь явуулж байдагэрээн мод зангаад зогсдог замын цагдаа биш. Шинэчлэлийн Засгийн газар нийт 19 сайдтай боловч тал хүрэхгүй нь энэ чуулганд сууж байна. Улс орны төсвийг хэлэлцэж байхад Засгийн газар ингэж л хандаж байна.  УИХ-ын гишүүдийг байр сууриа илэрхийлэхээр “Шүлсээ үсэргэлээ” гэж ярьж байна. Ийм байж болох уу. Өнгөрсөн хавар цөөнхийн бүлэг Ерөнхий сайдад хариуцлага тооцох тухай асуудлыг УИХ-д оруулж байсан, олонхийн бүлэг аваад үлдсэн. Түүнээс хойш ажил сайжирсан уу, юу ч сайжирсангүй. Хэрвээ олонхи хариуцлагаа тооцохгүй бол МАН хариуцлага тооцно. Бид Засгийн газар дотор орж суух гэсэн юм биш, бүтээлч сөрөг хүчин байна гэдгээ хэлж байгаа. Төсвийн тодотголыг хэлэлцэж байна гэдэг Засгийн газар үйл ажиллагаа явуулж чадахгүй байгаагийн илрэл” гэлээ.

Н.Энхболд гишүүний дараа О.Содбилэг гишүүн үг хэллээ. Тэрбээр "Төсвийн тодотголын үеэр манай бүлгийн гишүүд ч тэр АН-ын байнгын хорооны гишүүд ч тэр бүгд шүүмжлэлтэй хандаж байна. Төсөв үргүй зарагдаад байгаа талаар би жишээ баримттай зүйл хэлье. Манай Орхон аймагт "Эко хороолол" гэж баригдаж байгаа. Энд төсвийн тодотголоор инженерийн шугам сүлжээг нь хийж байгаа юм билээ. Дулааны шугам сүлжээг нь хийхдээ 2.2 тэрбум төгрөгөөр барьж байгаа. Гэтэл тэр хорооллын шугам сүлжээний дулаан дамжуулах хоолойг Монгол орны цаг уур, орчин нөхцөлд таараагүй, стандартын шаардлага хангаагүй гэсэн акт гарсан байна. Гэтэл ийм ажилд 2.2 тэрбумаар мөнгийг зарцуулж байдаг. Энэ мэтээр буруу бодлогогүй ажил хийж байна" гэв.

Харин С.Баярцогт гишүүн Эдийн засгийн хөгжлийн яамыг татан буулгах бодолтой байгаагаа хэллээ. Тэрбээр "2013 оны төсөвт тодотгол хийж байгаа нь 2014 оны төсөвт үүсч болзошгүй нөхцөл байдлаас сэргийлж байна гэсэн үг. Мөн  тухайн жилийн төсөвтэй хамт төсвийн тодотголыг хамт оруулж ирж байгаа нь 2014 оныхоо төсвийг зөв зүйтэй төсөвлөхөд хэрэгтэй зүйл. Нөгөө талаар бид анх Эдийн засгийн хөгжлийн яамыг байгуулагдаад яам хоорондын зохицуулалтыг хийх байх гэж бодож байсан. Гэтэл тэгсэнгүй. Тэгэхээр цаашид Эдийн засгийн хөгжлийн яамгүй болгомоор байна. Сангийн яам, Эдийн засгийн яамны статусыг нь нэг болгох ёстой. Манайх шиг жижиг эдийн засагтай бүх тоо баримт нь тодорхой оронд ганц яам байхад зүгээр юм байна. Эдийн засгийн хөгжлийн яам нь гадны хөрөнгө оруулалт болон макро тоогоо ярьдаг. Сангийн яам болохоор урсгал зардлаа ярьдаг. Тэгэхээр эцэст нь хариуцлага хүлээх хүн олдоггүй. Макро тоогоо Эдийн засгийн хөгжлийн яамнаасаа авч Сангий яам төлөвлөгөөгөө гаргадаг. Тэгэхээр хоёр талд салчихсан энэ олон тоогоо нэг талд нь төвлөрүүлмээр байна. Мөн нөхцөлтэй орлого тусгадаггүй байсан. Зарлага нөхцөлдүүлсэн орлогыг цаашид суулгамааргүй байна" гэсэн юм.

Чуулганы хуралдаан үргэлжилж байна.