УИХ-ын үдээс хойшхи хуралдаан эхэлж, Ерөнхий сайд Н.Алтанхуяг өнгөрсөн жил Засгийн газраас хэрэгжүүлсэн үнэ тогтворжуулах зорилготой зээлийн хөтөлбөрүүдийн үр дүнгийн талаар мэдээллээ. Тэрбээр доорх төслүүдэд дэвшилттэй зүйл олон байгаа ч анх удаа хэрэгжүүлсэн учраас алдаж оносон, анхаарахаар зүйлүүд бий гэдгийг тодотголоо.

1. Хүнсний гол нэрийн бараа бүтээгдэхүүний үнийг тогтворжуулах хөтөлбөрийг хэрэгжүүлэхийн тулд Засгийн газраас 137 тэрбум төгрөгийг зээл олгосон. Үүнээс махны хөтөлбөрт 87 тэрбум төгрөг олгосон нь эргэн төлөгдсөн. Мөн гурилын үнийг тогтвортой байлгахын тулд 48,7 тэрбум төгрөг гаргасан.  Энэ бол үнэ бууруулна гэсэн хөтөлбөр биш, үнийн өсөлтийг багасгах зорилготой юм. Тиймээс анхнаасаа тогтворжуулах хөтөлбөр гэж нэрлэсэн. Махны компаниуд дунд тендер зарлаж, зээл олгосон. Махны хувьд өнгөрсөн жил хугацаа алдсан. Мах бэлтгэлийн хугацаа өнгөрсөн 12 сараас эхэлсэн ч боломжийн хэрэгжлээ.

2.  Арилжааны банкаар дамжуулж бензин оруулж ирдэг 10 компанид санхүүгийн боломжийг нь харгалзаж үзээд зээл олгосон. Харьцангуй хямд үнэтэй зээл олгосон тул ханшны өөрчлөлт гарвал зохицуулалт хийнэ гэж тохирсон. Энэ хөтөлбөр амжилттай хэрэгжиж байна. Өнгөрсөн 10-р сарын 26-наас нэг жилийн хугацаанд шатахуун тогтвортой байж, 50 төгрөгөөр хямдарсан. Мөн шатахууныг олон эх сурвалжаас худалдан авдаг болсон.
 
3. Хавар болохоор барилгын сезон эхэлдэг. Энэ үед барилгын гол бараа бүтээгдэхүүн, түүхий эдийн үнэ өсдөг. Арматурын төмөр, цементийн хангалтыг сайжруулж, орон сууцны үнийг тогтворжуулах хөтөлбөрийг 3 жил хэрэгжүүлэхээр болсон. 276 тэрбум төгрөг гаргаж, үүнээс цементийн компаниудад 48 тэрбум, арматурын үнийг буулгахад 81 тэрбум, үйлдвэрлэлийг дэмжихэд 146 тэрбумыг олгосон.

4. Нүүрсний аюулгүй нөөцийг бүрдүүлэх, эрчим хүчний үнийг тогтворжуулах хөтөлбөрт 80 тэрбумыг төсөвлөснөөс 52 тэрбум төгрөг гараад хэрэгжиж байна. Манай эрчим хүчний компаниуд намар арилжааны банкнаас зээл авч нүүрс авдаг. Мөнгө нь хавар орж ирдэг. Тиймээс зээлийн хүүг нь багасгах үүднээс зээл олгож эхэлсэн. Хуучин 4-р цахилгаан станц 100 мянган тонн нөөцөлдөг байсан бол энэ жил 600-700 мянган тонн нүүрстэй болсон.

5. Өргөн хэрэглээний импортын барааны өртгийг бууруулах хөтөлбөр. Замын-Үүдээс УБ руу импортын бараа орж ирэхдээ олон хоног алддаг тул тээвэрлэлтийг шуурхай болгох шаардлагатай болсон. Ачаа тээвэрлэдэг вагоны тоог нэмэгдүүлсэн, УБТЗ-ын үйл ажиллагааны эргэлтэнд 22 тэрбумы зээлийг өгсөн. Үр дүнд нь нэг хоногийн дотор Замын-Үүдээс Улаанбаатар хотод ирдэг болсон гэлээ.