УИХ-ын чуулганы үдээс хойшхи нэгдсэн хуралдаанд “Үнэ тогтворжуулах дэд хөтөлбөр”-үүдийн талаар Монгол Улсын Ерөнхий сайд Н.Алтанхуягийн хийсэн мэдээллийг сонслоо.Ерөнхий сайдын мэдээлэлд дурдагдсанаар, “Монгол Улсын Засгийн газраас 2012 оны 10 дугаар сарын сүүлээс эхлээд гол нэрийн бараа бүтээгдэхүүний үнийг тогтворжуулах чиглэлийн хэд хэдэн хөтөлбөрийг хэрэгжүүлж эхэлсэн. Эдгээр хөтөлбөрүүд гурван жилийн хугацаатай. Хөтөлбөрийн гол санаа нь импортоор оруулж ирдэг бензин, дизелийн түлш буюу манай ард иргэдийн ахуй амьжиргаан дээр үнийн хамгийн их өсөлт авчирдаг, өнгөрсөн жил байнга үнэн нь өсч ирсэн бензин шатахууны асуудал дээр Засгийн газар юуны түрүүнд ач холбогдол өгч хөтөлбөрийг хэрэгжүүлсэн. Хөтөлбөр хэрэгжээд үндсэндээ нэг жил болж байна. Энэ хөтөлбөрийн хүрээнд 192 тэрбум төгрөгийг Монгол банк арилжааны банкуудад өгсөн. Манайд бензин шатахуун оруулж ирдэг тодорхой арав гаруй компани байгаа. Эдгээр компаниудын чадвар, зээлээ эргэн төлөх нөхцөлийг нь харгалзан үзэж зээл олгосон байгаа. Тэгэхдээ харьцангуй хямд үнэтэй зээл олгох, ханшны өөрчлөлт, эрсдэл гарах юм бол тодорхой хэмжээгээр зохицуулалт хийнэ гэсэн хоёр нөхцөл тавьсан. Энэ хөтөлбөр маань амжилттай хэрэгжиж байна. Хөтөлбөр хэрэгжиж эхэлснээс хойшхи нэг жилийн хугацаанд бензин шатахууны үнэ үндсэндээ тогтвортой байгаад зогсохгүй 50 төгрөгөөр хямдраад байна. Бензин, шатахуун оруулж ирэх олон эх үүсвэртэй болж, олон газраас бензин шатахуун оруулж ирэх боломж бүрдсэн. Мөн хүнсний гол нэрийн бараа бүтээгдэхүүний үнийг тогтворжуулах хөтөлбөрийг өнгөрсөн жилээс хэрэгжүүлж эхэлсэн. Энэ зорилтын хүрээнд 137 тэрбум төгрөгийг зээл болгож олгосон байгаа. Үүнээс маханд 87 тэрбум төгрөгийн зээл олгосон. Энэ мөнгө өнөөдрийн байдлаар 100 хувь эргэн төлөгдсөн байгаа. Гуриланд 48,7 төгрөгийг гаргасан байна. Энэ нь ямар учиртай юм гэхээр хавар болгон Улаанбаатарт махны үнэ нэмэгдэж иргэдийн бодит орлогоос нэлээдгүй хумсалдаг учраас махны үнийн өсөлтийг сааруулах зорилгоор хийгдсэн. Анхнаасаа үнэ бууруулна гэдэг хөтөлбөр хийгээгүй. Үнэ бол тодорхой хэмжээгээр өсөх байх гэхдээ тэр өсөлт бага байх юм гэж үзсэн” гэлээ.
“Үнэ тогтворжуулах дэд хөтөлбөр” нь “Шатахууны жижиглэнгийн худалдааны үнийг тогтворжуулах”, "Өргөн хэрэглээний импортын бараа, бүтээгдэхүүний өртгийг бууруулах" , “Хүнсний гол нэрийн бараа, бүтээгдэхүүний үнийг тогтворжуулах”, "Барилгын салбарыг дэмжих, улмаар орон сууцны үнийг тогтворжуулах" , “Нүүрсний аюулгүйн нөөц бүрдүүлэх, түлш, эрчим хүчний салбарын өвөлжилтийн бэлтгэл хангах, эрчим хүчний үнэ, тарифыг тогтворжуулах” , Шатахууны жижиглэнгийн худалдааны үнийг тогтворжуулах SIFS” гэсэн дэд хөтөлбөрүүдээс бүрдэж байгаа ажээ.
Монгол Улсын Ерөнхий сайд Н.Алтанхуягийн мэдээлэлтэй холбогдуулж УИХ дахь МАН-ын бүлгээс гаргасан дүгнэлтийг УИХ-ын гишүүн С.Бямбацогт танилцуулав.
Үүний дараа Ерөнхий сайдын мэдээлэлтэй холбогдуулан гишүүдийн зүгээс асуулт асууж хариулт авлаа гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.
