МАН-ын шинэ дарга, ерөнхий нарийн бичгийн даргыг сонгох 27-р Их хурал энэ ням гарагт болно. Намын Ерөнхий нарийн бичгийн даргад "нэр цэвэр" гэсэн шалгуураар сайд асан Д.Цогтбаатар, УИХ-ын гишүүн асан Ж.Сүхбаатар, намын нарийн бичгийн дарга Ж.Мөнхбат болон Элчин сайд асан Б.Энхмандах нар өрсөлдөхөөр болсон. Тэгвэл эдгээрээс нэр дэвшигчдээс олон нийт төдийлөн сайн мэдэхгүй байгаа хүн нь Б.Энхмандах юм. Түүнийг "казиногийн" гэх дуулиант хэрэгт холбогдож байсан тул үнэхээр "цэвэр" байж чадах уу гэдгийг асууж байна. 
   Харин үүнд нэр дэвшигч Б.Энхмандах хариулахдаа "Миний бүх юм цэвэр гэж хэлж чадна. Ялангуяа казиногийн хэрэгт холбогдож, татагдаж, шалгагдсан явдал намайг иж бүрэн шинжилгээнд оруулчихсан юм шүү дээ. Бүх зүйлээ шалгуулаад гурван шатны шүүхээр цагаатгагдсан" гэжээ. Тэрбээр одоо ямар нэгэн бизнес эрхэлдэггүй бөгөөд шаардлагатай бол данс, эд хөрөнгөө шалгуулахад бэлэн гэдгээ мэдэгдээд байна. Өмнө нь МАН-аас Ерөнхийлөгчийн сонгуульд нэр дэвшсэн УИХ-ын гишүүн Б.Бат-Эрдэнэ "цэвэр" гэсэн имижтэй гарч ирсэн ч өрсөлдөгчид нь олон "но"-той баримтууд гаргаад тавьчихсан удаатай билээ.