Монгол Улсын Ерөнхийлөгч Ц.Элбэгдоржийн урилгаар Бүгд Найрамдах Польш Улсын Ерөнхийлөгч Бронислав Коморовски 10 дугаар сарын 21-ний өдөр Монгол Улсад ажлын айлчлал хийв. Энэхүү айлчлал нь Монгол Улсын Ерөнхийлөгч Ц.Элбэгдоржийн 2013 оны 1 дүгээр сард Польш Улсад хийсэн айлчлалын хариу айлчлал байв.Геополитикийн байршлын хувьд төстэй, түүхэн хөгжлийн явцын хувьд ойролцоо, хүн ам, нутаг дэвсгэрийн хэмжээ, эдийн засгийн боломжийн хувьд Европт томоохонд орох, Европын Холбооны гишүүн Польш улстай хоёр талын дээд хэмжээний айлчлалын давтамжийг хадгалах, харилцаа, хамтын ажиллагааг цаашид өргөжүүлэхэд энэхүү айлчлал чухал ач холбогдолтой боллоо.
Айлчлалын үеэр Монгол Улсын Ерөнхийлөгч Ц.Элбэгдорж Бүгд Найрамдах Польш Улсын Ерөнхийлөгч Бронислав Коморовскитэй ганцаарчилсан уулзалт болон албан ёсны хэлэлцээ хийв. Мөн Польш Улсын Ерөнхийлөгч УИХ-ын дарга З.Энхболд, Ерөнхий сайд Н.Алтанхуяг нартай тус тус уулзав.Уулзалт, хэлэлцээний үеэр талууд хоёр орны харилцааны өнөөгийн байдлыг дүгнэн ярилцахын зэрэгцээ цаашид хоёр талын хамтын ажиллагааг бүхий л салбарт өргөжүүлэн хөгжүүлэх чиглэлийг тодорхойлох талаар дэлгэрэнгүй ярилцаж, санал солицов. Ялангуяа хоёр талын худалдаа, эдийн засаг, хөрөнгө оруулалтын салбарын хамтын ажиллагааг түлхүү хөгжүүлэх асуудлаар айчлалын үеэр ярилцаж, санал солилцов.
Тухайлбал, нүүрс олборлолт, зэс боловсруулалтын талаар арвин туршлагатай Польш Улстай энэ чиглэлээр хамтран ажиллах, харьцангуй үнэ хямдтай ч ЕХ-ны норм, стандартын дагуу үйлдвэрлэгддэг Польшийн уул уурхайн технологи, бусад машин, тоног төхөөрөмжийг нийлүүлэх, Польшийн Засгийн газраас олгодог “нөхцөлт тусламжийн зээл”-ийг авч, төсөл, хөтөлбөр хэрэгжүүлэх зэрэг асуудлыг ярилцав. Мөн олон улсын болон бүс нутгийн тулгамдсан асуудлаар санал солилцов.
Айлчлалын үеэр “Уул уурхай болон уул уурхайн тохог төхөөрөмжийн салбарт хамтран ажиллах тухай тунхаг бичиг”-т Уул уурхайн сайд Д.Ганхуяг, Польш Улсын Шадар сайд бөгөөд Эдийн засгийн сайд Я.Пехочиньски нар гарын үсэг зурав.
Түүнчлэн айлчлалын хүрээнд зохион байгуулагдсан Бизнесийн чуулга уулзалтад хоёр орны Ерөнхийлөгч нар оролцов. Польшийн Ерөнхийлөгчийг 50 гаруй Польшийн бизнесийн төлөөлөгчид дагалдан ирсэн бөгөөд уул уурхай, барилга, хүнсний болон эмийн үйлдвэрлэлийн чиглэлээр Монголын бизнес эрхлэгчидтэй уулзаж, хамтран ажиллах талаар ярилцаж, тохиролцлоо.
