Ардчилсан намынхан 20 давхар, 20 тэрбумын өртөгтэй "Ардчиллын Өргөө" нэртэй шинэ ордонтой болох мөрөөдөл нь талаар болсон тухай бид өмнө нь мэдээлсэн. "Ардчиллын Өргөө"-г барих байсан газраа Худалдаа хөгжлийн банкинд барьцаалж 90 тэрбум төгрөгийн зээл авснаар уг газраа алдахад хүрээд байгаа юм. Харин тэр 90 тэрбум төгрөгийг АН сонгуульд зарцуулсан учраас хэн идэж, уусан гэх маргаангүйгээр газраа банкны зээлэнд өгөхөөр болсон тухай баттай эх сурвалж хэлсэн. Тэгвэл эрх баригч намынхан намын байрны газраа алдчихлаа гээд зүгээр суулгүй дараагийн хувилбаруудаа гаргаж эхэллээ.

   Ардчилсан намын зүгээс УИХ-д суудалтай бүх намууд нэг байранд байх хуулийн төсөл санаачилж байгаа аж. Намууд тухайн байранд УИХ-д авсан суудлынхаа тоо, харьцаагаар өрөө авч суух гэнэ. Өөрөөр хэлбэл АН дангаараа хөрөнгө гаргаж байшин барих шаардлагагүйгээр бусад намтай хамтарна гэсэн үг. Зарим оронд ийм жишиг байдгийг ч судлаад авчээ. Харин энэ олон намын гишүүдийг хаана “агуулах” вэ гэдэг хамгийн сонирхолтой.

  Эхний хувилбар нь шинэ барилга барих. Мэдээж  барилгын зардлын тодорхой хэсгийг төсвөөс гаргаж, бусдыг нь намуудаас хувааж гаргах. Гэхдээ энэ нь биелэхэд хэцүү хувилбар. Учир нь улс төрийн намын байрыг улсын төсвөөс, татвар төлөгчдийн мөнгөөр барина гэвэл эсэргүүцэх хүн олон. Мөн бусад намуудын хувьд дараагийн сонгуульд энэ байранд багтаж чадаа ч уу, үгүй ч үү. Тиймээс тодорхойгүй зүйлд мөнгөө өгөх эсэх нь эргэлзээтэй.

  Харин дараагийн хувилбар нь МАН-ын гоёмсог “харш” Тусгаар тогтнолын ордныг “булаах”. Тодруулбал УИХ-д суудалтай намууд бүгд бэлэн байгаа Тусгаар тогтнолын ордонд суух талаар ярьж эхэлжээ. Энэ нь энгийн нэг явган яриа биш бөгөөд АН-ын удирдлагын түвшний хүмүүс МАН-ын нарийн бичгийн дарга нартай энэ асуудлаар аль хэдийн уулзжээ. Хэдийгээр МАН-ын удирдлагуудын албан ёсны байр суурь  тодорхой биш байгаа ч Тусгаар тогтнолын ордныг барихад их хэмжээний мөнгө хандивласан гишүүд нь дургүй байгаа нь мэдээж. Гэхдээ эрх баригч АН-ынхан “бид орон байргүй боллоо” гээд шууд гүйгээд орчихгүй нь мэдээж. МАН-ынхантай ямар нэгэн байдлаар наймаа, тохироо хийх бололтой.
   Ийм мэдээлэл сүүлийн үед АН болон МАН-ын удирдлагуудын дунд яригдаж байна. Ямартаа ч АН-ынхан 20 давхар, гоёмсог загвартай "Ардчиллын Өргөө"-г барьж чадахгүй болсон тул намуудын тухай хуульд өөрчлөлт оруулж, шинэ орон байртай болохоор зүтгэж эхэллээ.