Ардын нам ирэх ням гаригт намын XXVII их хурлаа хийх гэж байна. Энэ удаа намын дүрмийн өөрчлөлт, бүтцийн өөрчлөлт, намын даргаа солихоос эхлээд чамгүй олон асуудал хэлэлцэнэ.  Хурал ч нэлээд хэд хоног  үргэлжлэх нь тодорхой. МАН хэмээх томоохон институцийн хувьд дарга,  удирдлага нь хэн байх, намын ерөнхий нарийн бичгийн дарга хэн болох, Удирдах зөвлөлийн гишүүд хэн байх, үнэхээр шинэчлэгдэж чадах үгйү нь анхаарал татаж байгаа.

Намын их хуралд бэлтгэх комиссын дарга М.Энхболд өнгөрөгч Бага хурлаар ирэх сард болох Их хурлаа 720 гаруй төлөөлөгчтэйгөөр  хуралдуулахаар санал оруулсан боловч дэмжлэг аваагүй бөгөөд 1134 төлөөлөгчтэй хуралдахаар олонхийн санал авсан билээ. Энэ нь үүр болгоноос нэг төлөөлөл Их хуралд төлөөлөгчөөр сонгогдоно гэсэн үг.

Төлөөлөгчийн тоог ийнхүү нэмсэн нь элдэв хор найруулгаас зайлсхийх, хайрцаглагдахаас сэргийлэх, шинэчлэл ярих үед илүү олон хүн байлгах сонирхлоос үүдэлтэй байх.  Мөн залуучуудын төлөөллийг их хуралд олноор оролцуулах сайн талтай аж.

Энэ мэтээр намын Их хурлыг тойрсон үйл явцын өрнөл ойрын өдрүүдэд хэвлэлийнхэний халуун сэдэв болоод байгаа билээ.

МАН-ын хүчтэй лидерүүдийн нэг У.Хүрэлсүх л гэхэд Их хурлыг угтаж, “Шинэчилье” хөдөлгөөнийхөнд зөвлөгөө өгч эхэлсэн байна. Ерөөс залуучуудын “Шинэчилье” хөдөлгөөний ард тус У.Хүрэлсүхийг байгаа гэж ярьж, бичдэг билээ.

 У.Хүрэлсүх саяхан тус хөдөлгөөний залуустай уулзаж намын гишүүнчлэл, үзэл баримтлал, шинээр хэлэлцэгдэх гэж байгаа улс төрийн намын тухай хуулийн нэмэлт өөрчлөлтийн төсөл, Их хурлаар хэлэлцэгдэх гэж байгаа намын дүрэмтэй холбоотой асуудал, шинэчлэлийн талаар зөвлөгөө өгчээ. Харин намын даргыг шинээр сонгох асуудлын хувьд тэрбээр “Шинэчлэлийг олон залуусыг удирдлагад сонгох явдал гэж ойлгон асуудалд хандвал олон талын алдаа, дутагдлын эхлэл болох вий. Аливаа шинэчлэлийн зорилго сайжруулахад чиглэдэг. Ялангуяа намын шинэчлэл бол бодлогын үзэл баримтлалын байх учиртай. Үүнийг эв нэгдлээр л хийнэ” гэж байр сууриа илэрхийлсэн байна.

Харин У.Хүрэлсүх намын Их хуралдаа оролцох нь тодорхойгүй байгаа гэнэ. Гэхдээ тэрбээр алсаас өөрийнхөө удирддаг хөдөлгөөнд заавар зөвлөгөө өгч байгаа нь энэ юм байна.


Мэдээж, “Шинэчилье” нэгдсэн хөдөлгөөнийхөн бол Их хуралд чухал байр суурьтай оролцох хүмүүс. Тэд намын бүтцэд өөрчлөлт оруулах ёстой байр суурьтай байгаа бөгөөд намыг удирдаж чадах хүлээн зөвшөөрөгдсөн хүнийг сонгох нь чухал гэж үзэж байгаа аж. Хамгийн чухал нь намын дарга олон мянган гишүүдийнхээ итгэлийг даагаад энэ намыг одоо байгаа түвшнээс нь дордуулахгүй, илүү өндөр түвшинд гаргаад авч явах чадалтай, улс төрийн туршлагатай хүн байх ёстой гэсэн шалгуурыг тавьж байгаа аж. Цаашилбал “Шинэчилье” хөдөлгөөний зүгээс намын бүтэц зохион байгуулалтыг хүчтэй болгох, дүрмийн өөрчлөлтийг хийе гэдгийг ярьж байгаа аж.

Хамгийн гол нь намынхаа нэрээр дарга болж ирчихээд хариуцлага гэгчийг умартсан нөхдүүдээс намаа цэвэрлэж, эрх үүргээ адилхан барих удирдлагын багтай болох хэрэгтэй гэж шинэчлэгчид үзэж байгаа юм байна.

Мөн бодлогын шинэчлэл гэгчээс олны анхаарлыг татаж байгаа сэдэв бол Намын Их хурлаар хэн сонгогдож МАН-ыг удирдах эрх авах бол гэсэн асуудал. М.Энхболд, Н.Энхболд, Д.Лүндээжанцан, Ц.Нямдорж, С.Баяр гээд л хувилбарууд яригдаж байсан. Гэтэл одоо М.Энхболд, Н.Энхболдоос бусад нь янз бүрийн шалтгаанаар нэрээ татаад байгаа юм. Мөн цоо шинэ хүн заалнаас дэвшүүлэхийг  үгүйсгэхгүй юм.