Нийгэмд хамгийн их хүлээлт үүсгэсэн МАН-ын дараагийн дарга болох нь тодорхой байгаа М.Энхболд хэд хэдэн асуудалд хариу өгөв. Юуны өмнө МАН-аа ялагдсаны маргааш нь л шинэчлэл хийнэ хэмээн удирдлагуудаа муулж эхэлсэн “Шинэчлэлийн” гэх нэртэй шинэчлэгдэх бодлогогүй залуусыг дэмжихгүй гэдэгээ илэрхийллээ. Уг нь “Шинэчлэлийн” гэх эдгээр залуус Т.Аюурсайхныг намын даргад, Ж.Мөнхбатыгаа ерөнхий нарийн бичгийн даргад өрсөлдүүлнэ гэж ил тод зарлаад байгаа билээ.

    Тэгвэл МАН-ын дараагийн дарга болох гэж буй М.Энхболд “Шинэчлэлийн” гэх залуусын талаар “Би энэ шинэчлэлийн асуудал гаргаж тавьж байгаа залуучуудыг анх гарч ирж байхад нь уулзсан юм. Надтай уулзья гэж хүсэлт тавиад би уулзсан. Та нар намыг шинэчлэх гэж байгаа бол жинхэнэ утгаар нь шинэчлээрэй. Жинхэнэ шинэчлэл хийх гэж байгаа бол би та нарыг дэмжинэ. Зургаан сарын хугацаатай сайд майд гэсэн албан тушаалын шагнал аваад чимээгүй болчихдог шинэчлэл битгий хийгээрэй. Тийм юм бол шинэчлэл гэж ярьж явахын хэрэггүй шүү гэж үгээ хэлээд гаргасан. Тодорхой хугацаа өнгөрлөө. Намын хурал ч хаяанд ирчихлээ. Яг юу хийх гээд байгаа юм. Бид өнөөдөр намын мөрийн хөтөлбөртөө ямар тодотгол хийх юм, намын дүрэмдээ ямар тодотгол хийх юм. Жижиг засварын ажлууд шиг санагдаж болох юм л даа. Гэхдээ бүгдийг цогцоор нь авч үзэх ёстой. Өнөөдөр бид ерөөсөө улс орны хөгжлийн талаар МАН ямар байр суурь баримтлах ёстой юм, ямар хөтөлбөр чиглэл гаргах ёстой юм бэ гэдэг дээр томоохон баримт бичигүүдийг гаргаад явж байна. Шинэчлэлийн нөхөдүүд маань яг тэрэнтэй зэрэгцүүлээд “Үгүй ээ, та нарын энэ чинь зөв байна, энэ чинь буруу байна” гээд ингээд яваад байгаа зүйл ч төдийлэн харагдахгүй байна. Бодлого, үзэл баримтлал, намын өнөөгийн нөхцөл байдалд зөв үнэлэлт дүгнэлт өгөхөөс авхуулаад зохион байгуулалт, өөрчлөлт шинэчлэлт хийх арга зам, жанжин шугам гээд олон асуудлыг нарийвчлан авч үзсэн байх ёстой. Энэ бүхэн нэг сайн харагдаж өгөхгүй байна. Цагийг хүлээж, өөрсдийгөө бэлтгэж, намынхаа төлөө зүтгэх хугацаа тэдний өмнө байна. Түүнээс биш зүгээр нэг механик төсөл барьчихаад чадна бүтнэ гэх байдлаар хандах аваас үр дүнгээ өгөхгүй” хэмээн тайлбарлав.

    МАН-ын удахгүй тодрох даргын яриаг дүгнэж үзвэл шинэчлэлийн гэх залуусыг хэсэг хугацаанд ажигласан байна. Харамсалтай нь шинэчлэлийн залуус олигтой ажиллаагүй гэжээ. Мөн юу хийх гээд байгаа нь мэдэгддэггүй, том бодлогын асуудал ярьдаггүй гэх мэтээр шүүмжлээд зогсохгүй “та бүхний цаг болоогүй, цагаа хүлээгээд өөрсдийгөө бэлтгээд байж бай даа” хэмээн ахын ёсоор эелдэг зөвлөлгөө хайрлажээ. Үүний хариу болгож “Шинэчлэлийн хороо”-ны ерөнхий зохицуулагч, МАН-ын даргад нэрээ дэвшүүлэгч Т.Аюурсайхан “МАН-д бусдад барьцаалагдсан, наймаачин, нэр бохир дарга хэрэггүй” хэмээн мэдэгдэл хийсэн.
   
    Харин бие даагч гишүүн Ц.Даваасүрэн гишүүн нэгэн цагт харьяалалтай явсан МАН-ынхаа “шинэчлэгч” залуусын талаар “Тэд шинэчлэх ёстой цагт нь хаана байсан билээ гэдгээ буцаад санах хэрэгтэй байх аа. Намаа сульдсан үед нь далимдуулж, өшиглөх нь олигтой хүний үйлдэл биш. Бусдад сайхан сэтгэгдэл лав төрүүлэхгүй. Зовох цагт нөхрийн чанар танигддаг гэдэг биз дээ. МАН-ын дарга асан Даш-Ёндон гуай харин сайн хариу өгсөн байна билээ. Энэ нам бол ангаахай, дэгдээхэйн үүр биш гэж. Энэ намын өнөөгийн улс төрийн үйл явдлыг харахад улс төрд хувь хүний ноён нуруу, жудаг их чухал үүрэгтэй гэдэг нь харагддаг” гэсэн дүгнэлт хийв. Өөрөөр хэлбэл МАН-ын шинэчлэгч залууст хүн чанар гэдэг ойлголт байдаггүйг ч сануулаад авав.

    Ийнхүү МАН-ын дарга, ерөнхий нарийн бичгийн дарга хоёрыг авах сонирхолтой байгаа “шинэчлэлийн” гэх малгайтай хуучинсаг залуусыг олон хүн ээлж дараалан шүүмжилсээр байна.