Гадаад харилцааны сайд Л.Болдын урилгаар Бүгд Найрамдах Франц Улсын Гадаад хэргийн сайд Лоран Фабиус маргааш буюу 25-нд манай улсад айлчилна. Түүний айлчлал хоёр өдөр үргэлжлэх бөгөөд энэ нь тус улсаас Монгол Улсад Гадаад хэргийн сайдын түвшинд хийж буй анхны айлчлал юм.

Айлчлалын үеэр Франц Улсын Гадаад хэргийн сайд Л.Фабиус Монгол Улсын Ерөнхийлөгч Ц.Элбэгдорж, Ерөнхий сайд Н.Алтанхуяг нарт бараалхаж, Гадаад харилцааны сайд Л.Болдтой албан ёсны хэлэлцээ хийнэ.

Түүнчлэн Франц Улсын Гадаад хэргийн сайдын энэхүү айлчлал нь Монгол Улс, Франц Улстай  улс төрийн итгэлцэл, ойлголцлыг гүнзгийрүүлэх, харилцаа, хамтын ажиллагааг эдийн засгийн агуулгаар өргөжүүлэх эрх зүйн үндсийг бэхжүүлэхэд ач холбогдолтой аж.

Дашрамд дуулгахад Монгол Улс, Франц улстай 1965 онд дипломат харилцаа тогтоосон байдаг.