Сүүлийн өдрүүдэд МАН-ын Их хурлыг тойрсон маргаан мэтгэлцээн ихээхэн өргөжиж байна. Хамгийн сүүлийн байдлаар МАН-ын даргад М.Энхболд, Н.Энхболд хоёрыг намынх нь бүлэглэл фракциуд дэвшүүлэхээр болов. Үүнтэй зэрэгцээд УИХ-ын гишүүн Ж.Энхбаяр, Т.Аюурсайхан хоёр өөрсдийгөө дэвшүүлнэ гэж зарлав. Ингээд МАН-ын дараагийн даргад дөрвөн хүн өрсөлдөх нь тодорхой болов. Бас зарим ажиглагчид УИХ дахь МАН-ын бүлгийн дэд дарга С.Бямбацогтын нэрийг ч гаргасаар байна.

    Харин Ерөнхий нарийн бичгийн даргад Д.Цогтбаатар, Ж.Сүхбаатар, Б.Энхмандах, Ж.Мөнхбат гэсэн дөрвөн эрхэм өрсөлдөхөө зарлав.

    МАН доторх энэ бүх өрсөлдөөнийг эрх баригч хүчин АН-ынхан ихээхэн анхааралтай ажиглаж байгаа гэнэ. Эх сурвалжийн мэдээлж байгаагаар бол АН-ынхан мөнхийн өрсөлдөгч МАН-ын дотоод өрсөлдөөнд янз бүрийн хэлбэрээр оролцож байж магадгүй аж. Учир нь АН-ынхан МАН-ын Ерөнхий нарийн бичгийн даргаар Ж.Мөнхбат, Б.Энхмандах хоёрын нэгийг болвол өөрсддөө хэрэгтэй гэж ярилцсан байна. Тийм ч учраас энэ хоёр эрхэмд ил далд хэлбэрээр дэмжлэг үзүүлж болох юм гэх мэтээр АН-ын удирдлага анхаарал хандуулсан мэдээлэл ирэв. Хэрэв энэхүү мэдээлэл үнэн бол АН-ын бүлэглэлүүд МАН доторх өөрсдийн хамаатан садан, найд нөхөд, бизнесийн хэлхээ холбоогоороо дамжуулан Ж.Мөнхбат, Б.Энхмандах хоёрын дэмжигчдийн тоог нэмэгдүүлж байж болох юм.   

    АН-ын зарим бүлэглэлийн удирдагчдын өрсөлдөгч намынхаа гал тогоо руу өнгийсэн энэхүү улс төрийн нүүдлийн шалтгааныг урьдчилан тайлбарлах төвөгтэй юм. Ямар ч гэсэн АН-ынхан МАН-ын шинэчлэлийн үйл явцыг ихээхэн анхааралтай ажиглаж байгаа аж.