Ойрын өдрүүдэд улс төрчдийн хэрэглэж буй хамгийн топ үгээр “авлигажсан төсөв” гэдэг үг тодроод байна. Ерөнхий сайд Н.Алтанхуяг 2013 оны төсвийг авлигажсан төсөв гэдгийг зарласан бол шадар сайд Д.Тэрбишдагва энэ төсвийн 10 хувь нь авлигаар шийдэгдсэн төсөв байсан хэмээн мэдэгдээд байна. УИХ-ын бусад гишүүд өөрсдийнх нь баталсан төсөв авлига, хээл хахуулийн замаар батлагдсан гэж буйд бухимдаж байгаа тул тэднийг энэ үгээ батлахыг дахин дахин шаардаж эхэллээ.
   Учир нь үнэхээр 2013 оны төсвийг хийтэй, хуудуутай, авлигын замаар, хэн нэгний нөлөөллөөр баталсан бол УИХ-ын гишүүд бүгд авлигачид болж таарах гээд байна. Ялангуяа МАН-ынхан эрх баригчид олонхоороо төсвөө баталчихдаг адаг сүүлд нь бүх гишүүдийг авлигатай төсөв баталсан гэж байгаа нь зүйд нийцэхгүй гэж үзэж байгаа юм. Ер нь Ерөнхий сайд, шадар сайд нарын дээрх мэдэгдэл цаагуураа манай яамдад олон авлигачид байгаа гэж хэлээд байх шиг. Тиймээс бусад УИХ-ын гишүүд ч, төрийн албан хаагчид ч Н.Алтанхуяг, Д.Тэрбишдагва нарыг хэн гэдэг эрх мэдэлтэн, ямар төсөл авлигадсан хутгалдсан бэ, УИХ-ын ямар гишүүн лобби хийж өгсөн бэ гэдгийг дэлгэхийг шаардаж байна. Гэвч тэд 2013 оны төсөв үнэхээр авлигажсан төсөв байсан гэдгийг албан ёсоор баталж, баримт дэлгэж чадахгүй байна. Ам нээвэл уушиг нээ гэдэг шиг төрийн өндөр албан тушаалтны хувьд чуулган дээр, олон нийтийн өмнө хэлсэн мэдэгдлээ батлах учиртай. Сайн хүн болох гэж сенсаацтай зүйл яриад, тэрийгаа батлалгүй усанд хаясан чулуу шиг алга болох нь зүйд нийцэхгүй.
 
  Н.Алтанхуяг сайд яаж төсөв “авлигаждаг” талаар хэлэхдээ нэг төслийг өөрийнх нь өртөгөөс өндөр үнээр батлуулчихаад тэрийг нь  гүйцэтгэгч байгууллага болон авлигачин гишүүн хоёр хуваагаад идчихдэг тухай нэгэнтээ ярьсан. Тэрбээр 2013 оны төсөв хэрхэн авлигал болж хувирсан талаар багагүй мэдээлэлтэй байгаа нь гарцаагүй. Гэвч үүнийгээ баримттайгаар хэлж чадахгүй байна.

   Уг нь Засгийн газар болон АН-ын томчуудад авлигажсан төсвийн жагсаалтыг гаргасан байгаа аж. Өчигдөр УИХ-ын дарга З.Энхболд “Авилгалдсан төсвийн жагсаалтанд 30 сургууль, 17 цэцэрлэг, 9 дотуур байр, 21 соёлын төв, 10 эмнэлэг 11 номын сан хамрагдсан” гэж мэдээлсэн. Тэгэхээр энэ 30 сургууль, 10 эмнэлэгт чухам ямар газрууд багтаж байгаа, төсвийг нь давуулан батлахад хэн үүрэг гүйцэтгэсэн гээд дэлгэрэнгүй мэдээлэл тэдэнд байх ёстой. Хэрэв дээрх мэдээллийг олон нийтэд дэлгэж өгвөл авлигачид хариуцлагаа хүлээж, дахиж төсвөөс хулгайлдагаа зогсоох нь гарцаагүй. Даан ч одоогоор манай Засгийн газарт ийм эр зориг дутаад байна.